Listasafnið fær fimm verk eftir Kristínu að gjöf

Listasafnið á Akureyri hefur fengið fimm ný verk eftir listakonuna Kristínu Gunnlaugsdóttur í safneign sína. Eitt verkanna var gjöf frá listakonunni sjálfri en fjögur komu frá einkaaðilum. Með viðbótinni styrkist safneignin verulega og gefur nú heildstæðari mynd af löngum og fjölbreyttum ferli hennar.

Í tilefni af nýju verkunum var opnuð sýning með verkum Kristínar úr safneign safnsins á alþjóðlega safnadeginum, 18. maí sl. Yfirskrift dagsins í ár var Söfn sem sameiningarafl í sundruðum heimi og var meðal annars lögð áhersla á hlutverk kvenna, seiglu og samkennd í samfélaginu.

Kristín Gunnlaugsdóttir fæddist á Akureyri árið 1963 og hefur starfað að myndlist frá útskrift. Hún nam við Myndlistaskólann á Akureyri og Myndlista- og handíðaskóla Íslands, auk þess sem hún lagði stund á íkonagerð í Róm og lauk framhaldsnámi frá Accademia di Belle Arti í Flórens árið 1994. Verk hennar byggja á sterkri tengingu við klassíska málaralist en einkennast jafnframt af fjölbreyttum efnistökum og aðferðum. Hún hefur meðal annars unnið með olíu og eggtemperu með blaðgulli, auk kola og útsaums.

Fyrir átti safnið þrjú verk eftir Kristínu, öll frá ákveðnu tímabili á tíunda áratugnum. Með nýju verkunum fæst víðari sýn á þróun listsköpunar hennar, þar sem verk frá ólíkum tímabilum og með mismunandi áherslum endurspegla fjölbreytileika ferilsins. Verkin spanna allt frá klassískum og fígúratívum myndheimum yfir í nýrri og óhlutbundnari nálganir. Þrátt fyrir fjölbreytileikann bera þau skýr höfundareinkenni þar sem táknrænt myndmál og samtímaleg efnistök mætast.

Með þessum nýju aðföngum telja forsvarsmenn safnsins að það verði betur í stakk búið til að miðla sérstöðu og þróun í verkum Kristínar Gunnlaugsdóttur og staðsetja framlag hennar í samhengi íslenskrar samtímalistar.

Sýningin með verkum Kristínar er í sal 12 á Listasafninu og stendur til 6. september 2026.