Laxness í norska Amaróhúsinu
17. apríl 2026 | kl. 12:00
Birgir Orri Ásgrímsson
Forsetahjónin á Akureyri – MYNDIR
11. apríl 2026 | kl. 10:00
Halla Tómsdóttir forseti Íslands og eiginmaður hennar, Björn Skúlason, vörðu gærdeginum á Akureyri. Kveikja ferðarinnar var Sjálfbærniráðstefnan, sú sjötta sem fer fram í Háskólanum á Akureyri (HA) en hjónin heimsóttu einnig Menntaskólann á Akureyri (MA), Birtu - félagsmiðstöð fólksins við Bugðusíðu, og voru síðan viðstödd næst síðustu sýningu Leikfélags Akureyrar á Birtíngi Voltaires í Samkomuhúsinu.
Sjálfbærniráðstefnan í Háskólanum á Akureyri. Frá vinstri: Kjartan Sigurðsson, fulltrúi í Umhverfisráði HA, Yvönne Höller formaður Umhverfisráðs HA, Björn Skúlason, eiginmaður forseta, Halla Tómasdóttir, forseti Íslands og Áslaug Ásgeirsdóttir rektor Háskólans á Akureyri. Mynd af Facebook síðu HA.
„Eftir að hafa flutt ávarp og hlýtt á opnunarfyrirlestur ráðstefnunnar tók forseti þátt í sófaspjalli um framtíð háskólamenntunar á Landsþingi Landssamtaka íslenskra stúdenta sem einnig er haldið í HA nú um helgina,“ segir á vef forsetaembættisins. Í hádeginu snæddu forsetahjón með gestum og starfsfólki Birtu og þaðan lá leiðin í Menntaskólann á Akureyri (MA) þar sem forseti ræddi við nemendur á sal.
Halla Tómsdóttir forseti Íslands ræðir við nemendur í Kvosinni, sal Menntaskólans á Akureyri. Með henni á sviðinu er Elvar Björn Ólafsson nemandi við skólann sem stýrði umræðum. Mynd af vef embættis forseta Íslands.
„Í ávarpi sínu á sjálfbærniráðstefnunni, sem Umhverfisráð HA skipuleggur, sagði forseti að áskoranir á sviði umhverfismála kölluðu á fleira en vísindalega þekkingu og tæknilegar lausnir. Hún lagði áherslu á að mannkynið þyrfti nú, líkt og jafnan þegar blikur væru á lofti, á hugrekki að halda en einnig seiglu, trú á framtíðina og þakklæti fyrir þau tækifæri sem núlifandi kynslóðir hefðu til að framkalla breytingar,“ segir á vefnum forseti.is.
Halla Tómasdóttir forseti Íslands í samtali við Aðalbjörn Jóhannsson, forseta Stúdendafélags HA, og Lísu Margréti Gunnarsdóttur, forseta LSÍ. Mynd af vef embættis forseta Íslands.
„Seiglu bar einnig á góma í sófaspjalli forseta við Aðalbjörn Jóhannsson, forseta Stúdendafélags HA, og Lísu Margréti Gunnarsdóttur, forseta LSÍ. Þau ræddu um áhrif gervigreindar á háskólamenntun og framtíðarstarfsvettvang ungs fólks. Forseti sagði að sú kynslóð sem nú væri í háskólanámi þyrfti að búa sig undir að uppfæra menntun sína og starfshæfni með reglulegu millibili. Dýrmætasta veganestið sem þau fengju út í lífið væru seigla, sveigjanleiki og samskiptahæfni.“
„Birna Guðrún Baldursdóttir, forstöðumaður tómstundamála hjá Akureyrarbæ, tók á móti forsetahjónum í félagsmiðstöðinni Birtu. Þau hittu þar meðal annars vaska snókerspilara og pílukastara sem hvöttu Björn Skúlason, maka forseta, til að spreyta sig. Einnig heilsuðu forsetahjón upp á gesti sem nýta aðstöðu í Birtu til að sinna handavinnu og leirkeragerð.“
Birna Guðrún Baldursdóttir, forstöðumaður tómstundamála hjá Akureyrarbæ, og Halla Tómasdóttir forseti Íslands. Mynd af vef Akureyrarbæjar.
„Áður en samtalið á sal MA hófst sæmdi Karl Frímannsson skólameistari forseta gulluglu, sem er æðasta heiðursmerki skólans. Fyrsti einstaklingurinn til að hljóta þennan heiður var Kristján Eldjárn, þáverandi forseti Íslands, árið 1980. Í sófaspjalli forseta við Elvar Björn Ólafsson, nemanda á raungreina- og tæknibraut MA, beindist athyglin að þeim neikvæðu áhrifum sem samfélagsmiðlar geta haft á líðan almennings. Forseti hvatti til þess að ungt fólk setti sér mörk í notkun snjalltækja. Einnig ræddu þau Elvar Björn um gildi góðvildar og mikilvægi beinna samskipta manna á milli. “
Forsetahjón luku deginum á því að sjá uppfærslu Leikfélags Akureyrar á Birtíngi Voltaires í leikgerð og leikstjórn Bergs Þórs Ingólfssonar.
Björn Skúlason eiginmaður forseta Íslands og Hallgrímur Stefán Ingólfsson spiluðu billjard í Birtu. Mynd af vef Akureyrarbæjar.
Forsetahjónin ásamt leikurum og öðrum starfsmönnum Leikfélags Akureyri eftir sýningu á Birtíngi Voltaires í Samkomuhúsinu. Mynd af Facebook síðu MAk: Þorgeir Baldursson.
Björn Skúlason, eiginmaður forseta, Eva Hrund Einarsdóttir, framkvæmdastjóri Menningarfélags Akureyrar (MAk), Halla Tómasdóttir, forseti Íslands og Bergur Þór Ingólfsson, leikhússtjóri Leikfélags Akureyrar. Mynd af Facebook síðu MAk: Þorgeir Baldursson.
Hólmfríður Hafliðadóttir leikkona og Halla Tómasdóttir forseti Íslands. Mynd af Facebook síðu MAk: Þorgeir Baldursson.
Karl Frímannsson, skólameistari Menntaskólans á Akureyri (MA), og Halla Tómasdóttir forseti Íslands á gömlu heimavistinni í Gamla skóla. Mynd af Facebook síðu MA.
Björn Skúlason, eiginmaður forseta Íslands, spilar billjard félagsmiðstöðinni Birtu. Mynd af vef Akureyrarbæjar.
Að lesa um afa
14. mars 2026 | kl. 11:30
Innflytjendur, samningar og staðreyndir
12. desember 2025 | kl. 06:00
Hvorki „allt lokað“ né „allt opið“
18. júní 2025 | kl. 19:30
Alþjóðaflugvöllurinn á Akureyri: Hvar er Icelandair?
26. febrúar 2025 | kl. 11:45
Lykill að áframhaldandi velgengni
26. nóvember 2024 | kl. 18:50
