Aron Einar ræðir við nýtt félag í Katar

Knattspyrnumaðurinn Aron Einar Gunnarsson leikur hugsanlega áfram í Katar næsta vetur. Landsliðsfyrirliðinn fyrrverandi verður þó ekki áfram í herbúðum Al Gharafa, sem hann lék með tvö síðustu keppnistímabil, heldur er Aron í viðræðum við annað félag.

Aron Einar, sem varð 37 ára í apríl, hefur verið sterklega orðaður við Þór undanfarnar vikur og ekki er útilokað að hann snúi heim og leiki með uppeldisfélaginu síðari hluta sumars í Bestu deildinni, en það veltur á niðurstöðum viðræðna við katarska liðið.

Enn er sem sagt óljóst hvað verður en óhjákvæmilegt er annað en að nefna til gamans, að félagaskiptaglugginn hérlendis verður opnaður á ný 16. júlí. Fyrsti leikur Þórs eftir það er tveimur dögum síðar – á heimavelli gegn Íslandsmeisturum Víkings.

Eftir mörg ár í ensku deildakeppninni með Coventry og Cardiff samdi Aron Einar við Al-Arabi í Katar þar sem hann lék frá 2019 til 2024. Hann lék síðan hluta sumarsins 2024 með Þór í næstu efstu deild Íslandsmótsins en gekk til liðs við Al Gharafa síðsumars og var í herbúðum liðsins tvær leiktíðir. Félagið varð bikarmeistari í Katar bæði árin og Aron kvaddi Al Gharafa með góðri frammistöðu í lokaleik nýliðins keppnistímabils, bikaúrslitaleiknum, þar sem liðið vann Al Sadd 4:1.