Blak: Oddaleik þarf hjá KA og Völsungi

Völsungur bar sigurorð af KA í öðrum leik liðanna í úrslitakeppni efstu deildar kvenna í blaki á Húsavík í dag. Heimakonur unnu þrjár hrinur gegn einni en KA vann fyrsta leik liðanna með sama mun og liðin þurfa því að leika oddaleik í KA-heimilinu næstkomandi fimmtudag um það hvort liðið kemst í úrslitarimmuna um Íslandsmeistaratitilinn.

Leikurinn í dag var mjög jafn nánast allan tímann og flestar hrinurnar æsispennandi. KA náði að landa 25:23 sigri í fyrstu hrinu en heimastúlkur jöfnuðu með 25:21 sigri í jafnri annarri hrinu. Þær tóku síðan 2:1 forystu með 25:23 sigri í hnífjafnri þriðju hrinu og tryggðu sér sigurinn með því að vinna fjórðu hrinuna 25:20.

Úrslitin þýða að liðin þurfa að leiða saman hesta sína í einum leik til viðbótar og sigurvegarinn í oddaleiknum mætir annaðhvort Aftureldingu eða HK í úrslitum um Íslandsmeistaratitilinn en oddaleik þarf einnig til að skera úr um sigurvegarann í viðureign þeirra liða. Oddaleikirnir fara báðir fram næstkomandi fimmtudag.