Nýtt nám í áfengis- og vímuefnaráðgjöf

Nýtt þriggja ára bakkalárnám í áfengis- og vímuefnaráðgjöf verður sett á laggirnar við Háskólann á Akureyri (HA). Áætlað er að fyrsti nemendahópurinn hefji nám haustið 2027 og að í honum verði um 15 manns. Námið verður kennt við hjúkrunarfræðideild háskólans og er ætlað að bregðast við aukinni þörf fyrir sérhæft fagfólk á sviði fíknivanda. 

Háskólaráð HA samþykkti á fundi sínum 26. september sl. að setja námið á laggirnar. Að því er fram kemur í frétt á vefsíðu HA er um að ræða 180 ECTS-eininga nám, hið fyrsta sinnar tegundar á Íslandi. Hingað til hefur Símenntun Háskólans á Akureyri boðið upp á umfangsmikil námskeið á þessu sviði. 

Áhersla á klíníska færni og þverfaglegt samstarf

Námið á að búa nemendur undir störf við forvarnir, ráðgjöf, meðferð og endurhæfingu fólks með fíknivanda, auk þess að efla stuðning við fjölskyldur þess. Áhersla verður lögð á klíníska þekkingu og færni, gagnreyndar aðferðir, fagmennsku, rannsóknarlæsi og þverfaglega teymisvinnu. Námið verður að mestu leyti kennt í fjarnámi, en reglulegar staðlotur verða við háskólann. Þá verður klínískt nám á viðeigandi vettvangi hluti af náminu.

Námsleiðin verður vistuð við hjúkrunarfræðideild á heilbrigðis-, viðskipta- og raunvísindasviði HA. Hún mun að stórum hluta byggjast á námskeiðum sem þegar eru kennd við háskólann, en jafnframt verða þróuð sex ný, sérhæfð klínísk námskeið í áfengis- og vímuefnaráðgjöf.

Með nýju námsleiðinni vill Háskólinn á Akureyri styrkja menntun og fagmennsku á sviði fíknivanda og skapa skýrari náms- og starfsleið fyrir framtíðarráðgjafa. Jafnframt er markmiðið að efla heilbrigðis- og félagsþjónustu um land allt og bæta möguleika fólks með fíknivanda og fjölskyldna þess til að fá heildræna og gagnreynda þjónustu.