Kvennalið Akureyrar gegn Þrótti árið 1956
GAMLA ÍÞRÓTTAMYNDIN – 107
Kvennalandslið Íslands í handbolta tekur nú þátt í heimsmeistaramótinu sem fram fer í Þýskalandi. Af því tilefni er hér dregin fram, sem gamla íþróttamyndin þessa helgina, mynd af konum í handbolta á moldarvellinum, sem svo var kallaður; litlum velli austan við Íþróttavöllinn við Hólabraut. Moldarvöllurinn, það litla svæði á milli Akureyrarvallar og Glerárgötu, var sannkallaður fjölnota völlur; þar var aðallega stundaður fótbolti en einnig körfubolti og handbolti, og margan veturinn var þar útbúið skautasvell.
En aftur að mynd dagsins: Þarna eigast við Akureyringar og Þróttarar úr Reykjavík árið 1956 á moldarvellinum. Leikmaður Akureyrarliðsins, mjög líklega Halla Jónsdóttir, er fremst í hraðaupphlaupi og þrátt fyrir glæsileg tilþrif markvarðar Þróttar hefur Akureyringurinn sennilega skorað en boltinn skotist út úr markinu aftur, því ef vel er gáð má sjá að gleðin skín úr andlitum annarra leikmanna Akureyrarliðsins en skyttunnar, sem er afar einbeitt. Boltinn er við höfuð markvarðarins.
Mynd af liði Íþróttabandalags Akureyrar þetta sama ár birtist sem gamla íþróttamyndin hér á akureyri.net fyrir tveimur árum, í nóvember 2023. Sú mynd var tekin af liðinu áður en það hélt í keppnisferð til Færeyja.
Nánar hér:
