Fréttir
Hlíðarfjall verður opnað í næstu viku
27.11.2025 kl. 15:45
Skíðabrekkurnar í Hlíðarfjalli verða opnaðar eftir nokkra daga. Mynd: hlidarfjall.is.
Skíðasvæðið í Hlíðarfjalli verður opnað fimmtudaginn 4. desember. Byrjað verður á því að opna neðra svæðið.
Samkvæmt upplýsingum á Facebooksíðu Hlíðarfjalls hafa síðustu vikur verið vel nýttar til snjóframleiðslu og hefur safnast vel í helstu brekkur á neðra svæðinu. Áfram vantar þó snjó á ákveðin svæði og á efra svæði. Á göngusvæði hefur verið þriggja kílómetra langt spor í ljósahringnum frá síðustu mánaðamótum og stendur til að ná því í fulla lengd sem fyrst.
Rukkað inn á göngusvæðið
Opið verður á fimmtudaginn frá kl. 15 til 20, á föstudag verður opið milli kl. 14 og 19 og á laugardag og sunnudag verður opið milli klukkan 10 og 16. Forsala vetrarkorta er í fullum gangi á vefnum hlidarfjall.is, en þar verður einnig að finna upplýsingar um áframhaldandi opnun í fjallinu. Athugið að miðahlið verður tekið í notkun á göngusvæði samhliða opnun svo miði eða kort er nauðsynlegt.
