Halda sig við þriggja hæða hús við Miðholt
Skipulagsráð Akureyrarbæjar hefur samþykkt að leggja til við bæjarstjórn að auglýst verði tillaga að breytingu á deiliskipulagi Holtahverfis norður fyrir svæði sem afmarkast af Langholti, Miðholti, Krossanesbraut og lóðamörkum Undirhlíðar 1 og 3. Niðurstaða skipulagsráðs er að leyfa skuli þriggja hæða fjölbýlishús í stað tveggja hæða samkvæmt gildandi deiliskipulagi.
Með breytingunni fjölgar íbúðum sem leyfilegt er að byggja á reitnum úr 30 í 54. Gert er ráð fyrir að leyfilegt verði að byggja einn bílakjallara innan lóðarmarka með aksturstengingu frá Langholti. Áfram er reiknað með innakstri á bílastæði úr Miðholti, en innkeyrslum fækkað úr fimm í tvær. Frá fyrri tillögu hefur verið bætt við stígum og gróðri á opnu svæði, auk þess sem gerðar eru breytingar á hámarkshraða í Langholti og bætt við gönguþverun.
Uppdráttur af lóðum 1-9 við Miðholt ásamt umferðartengingum og götuþverun yfir Langholt eins og skipulagsráð leggur nú til við bæjarstjórn að verði auglýst.
Akureyri.net hefur áður fjallað um mótmæli íbúanna vegna áformaðra breytinga, þar á meðal óánægju með hækkun húsa og fjölgun íbúða sem hafi í för með sér óeðlilega aukningu á umferð um Miðholt.
