Garðar Atli og Tobias keppa í Mónakó

Garðar Atli Gestsson og Tobias Þórarinn Matharel úr Ungmennafélagi Akureyrar hafa verið valdir til að keppa fyrir Íslands hönd á Smáþjóðameistaramóti Evrópu í frjálsíþróttum í Mónakó laugardaginn 30. maí. Mótið er haldið annað hvert ár og þar koma saman keppendur frá 18 „smáþjóðum“ í Evrópu.

Aðeins einn íþróttamaður frá hverju landi er valinn til keppni í hverri einstaklingsgrein. Garðar mun keppa í spjótkasti í Mónakó en Tobías í langstökki og boðhlaupi.

Þjóðirnar sem taka þátt á mótinu eru, auk Íslands, Andorra, Albanía, Armenía, Aserbaísjan, Bosnía og Hersegóvína, Kýpur, Georgía, Gíbraltar, Kósóvó, Liechtenstein, Lúxemborg, Moldóva, Norður Makedónía, Malta, Mónakó, Svartfjallaland og San Maríno.

Margir kannast við Smáþjóðaleikana sem haldnir eru annað hvort ár. Þar keppa íþróttamenn nokkurra fámennustu landa álfunnar – Andorra, Kýpur, Íslands, Liechtenstein, Lúxemborgar, Möltu, Mónakó, Svartfjallalands og San Marínó – í fjölmörgum greinum. Mótið sem framundan er í Mónakó er einnig haldið á tveggja ára fresti, ekki sömu ár og Smáþjóðleikarnir.