Fara í efni
Fréttir

Enginn ráðherra úr Norðausturkjördæmi

Oddvitar stjórnarflokkanna í Norðausturkjördæmi: Ingibjörg Ólöf Isaksen - Njáll Trausti Friðbertsson - Bjarkey Olsen Gunnarsdóttir.

Enginn oddvita stjórnarflokkanna í Norðausturkjördæmi verður ráðherra í nýrri ríkisstjórn Katrínar Jakobsdóttur, sem tekur við völdum í dag.

Ingibjörg Ólöf Isaksen, Framsóknarflokki, er 1. þingmaður kjördæmisins, Njáll Trausti Friðbertsson er oddviti Sjálfstæðisflokksins og Bjarkey Olsen Gunnarsdóttir er oddviti VG.

Ráðherra í þessu öðru ráðuneyti Katrínar Jakobsdóttur verða 12 en voru 11 í ríkisstjórninni sem lætur af störfum í dag. Kristján Þór Júlíusson var sjávarútvegs- og landbúnaðarráðherra en er hættur á Alþingi og hverfur úr ríkisstjórn. Nýir ráðherrar eru Willum Þór Þórsson, nýliði á þessum vettvangi, og Jón Gunnarsson, sem var samgöngu- og sveitarstjórnarráðherra 2017.

Ný ríkisstjórn Katrínar Jakobsdóttur er skipuð sem hér segir:

Ráðherrar Vinstri grænna

  • Katrín Jakobsdóttir, formaður flokksins, verður áfram forsætisráðherra.
  • Guðmundur Ingi Guðbrandsson verður félags- og vinnumarkaðsráðherra – var áður umhverfis- og auðlindaráðherra.
  • Svandís Svavarsdóttir verður ráðherra matvæla, sjávarútvegs og landbúnaðar – var heilbrigðisráðherra.

Ráðherrar Sjálfstæðisflokks

  • Bjarni Benediktsson, formaður flokksins, verður áfram fjármála- og efnahagsráðherra.
  • Þórdís Kolbrún Reykfjörð Gylfadóttir verður utanríkisráðherra – var ráðherra ferðamála-, iðnaðar- og nýsköpunar.
  • Guðlaugur Þór Þórðarson verður ráðherra umhverfis- og loftslagsmála – var utanríkisráðherra.
  • Áslaug Arna Sigurbjörnsdóttir verður ráðherra nýsköpunar, iðnaðar og háskóla – var dómsmálaráðherra.
  • Jón Gunnarsson verður dómsmálaráðherra allt að 18 mánuðum og Guðrún Hafsteinsdóttir, nýr oddviti flokksins í  Suðurkjördæmi, tekur síðan við því embætti.

Ráðherrar Framsóknarflokks

  • Sigurður Ingi Jóhannsson, formaður flokksins, verður innanríkisráðherra – var samgöngu- og sveitastjórnarráðherra. 
  • Willum Þór Þórsson verður heilbrigðisráðherra – hefur ekki setið á ráðherrastóli áður. 
  • Lilja Alfreðsdóttir verður viðskipta- og menningarmálaráðherra – var áður mennta- og menningarmálaráðherra.
  • Ásmundur Einar Daðason verður skóla- og barnamálaráðherra – var áður félags- og barnamálaráðherra.

Þá er ljóst að Birgir Ármannsson, Sjálfstæðisflokki, verður forseti Alþingis.