Dagur Árni bestur á Opna Evrópumótinu
Dagur Árni Heimisson var valinn besti leikmaður Opna Evrópumóts landsliða 19 ára og yngri í handbolta sem lauk í Gautaborg í Svíþjóð í kvöld, föstudagskvöld. Ísland tapaði úrslitaleiknum 31:30 fyrir Spánverjum. Þessi stórefnilegi KA-maður, sem gekk í sumar til liðs við Val, er fyrirliði Íslands.
Opna Evrópumótið er jafnan haldið samhliða Partille Cup, stærsta handboltamóti heims fyrir ungmenni, sem fer árlega fram í Gautaborg. Landslið kvenna og karla leika annað hvert ár til skiptis.
- Dagur Árni hlaut titilinn MVP - Most Valuable Player; sá er stundum kallaður sá mikilvægasti, sem má til sanns vegar færa, en Akureyri.net leyfir sér að kalla hann bestan. Og auðvitað er hann mikilvægastur, ef út í það er farið ...
Tveir aðrir íslenskir strákar voru valdir í úrvalslið keppninnar, Jens Sigurðsson markvörður og vinstri hornamaðurinn Bessi Teitsson.
Úrvalsliðið er þannig sett saman að valinn er einn maður í hverja stöðu, besti varnarmaður að auki og síðan sá besti – eða mikilvægasti, ef menn vilja frekar nota það orð.
Dagur Árni gerði 2 mörk í úrslitaleiknum og einnig félagi hans úr KA, línumaðurinn Jens Bragi Bergþórsson.
- Umfjöllun handbolti.is: Töpuðu úrslitaleiknum með minnsta mun
