Björk og Óskar Páll leiða í meistaraflokki
Keppni á Akureyrarmótinu í golfi hófst í morgun og lýkur á laugardaginn. Eftir fyrsta keppnisdag af fjórum er Björk Hannesdóttir með forystuna í meistaraflokki kvenna og Óskar Páll Valsson leiðir karlaflokkinn. Mjótt er á mununum og líklegt að einhverjar sviptingar eigi eftir að eiga sér stað áður en yfir lýkur á laugardag.
Alls eru 178 kylfingar skráðir til leiks að þessu sinni og skiptast niður í nokkra flokka eftir forgjöf, auk þess sem keppt er í öldungaflokkum 50 ára og eldri og 70 ára og eldri. Flokkarnir leika ýmist fjóra daga eða þrjá.
Landslið Íslands í golfi eru að keppa á EM þessa dagana og því vantar nokkra sterka keppendur í meistaraflokkum á Akureyrarmótinu.
Í meistaraflokki kvenna eru þrír keppendur og þær Andrea Ýr Ásmundsdóttir og Kara Líf Antonsdóttir eru skammt á eftir Björk að afloknum fyrsta keppnisdegi.
- Björk Hannesdóttir 78 högg
- Andrea Ýr Ásmundsdóttir 81 högg
- Kara Líf Antonsdóttir 83 högg
Í meistaraflokki karla eru 18 keppendur og ef marka má fyrsta keppnisdaginn verður keppnin hörkuspennandi allt til loka. Aðeins fimm högg skilja að Óskar Pál í 1. sæti og Val Snæ Guðmundsson í 13. sæti. Gríðarlega jöfn og spennandi keppni í uppsiglingu.
- Óskar Páll Valsson 73 högg
- Patrik Róbertsson 74 högg
- Ragnar Orri Jónsson 74 högg
Næstir á eftir þeim koma Tumi Hrafn Kúld og handknattleiksmarkvörðurinn góðkunni Ágúst Elí Björgvinsson á 4 höggum yfir pari.
Óskar Páll Valsson slær af fyrsta teig í morgun. Hann leiðir í meistaraflokki karla en margir kylfingar eru skammt undan. Mynd: Skapti Hallgrímsson.
Efst í öðrum flokkum
Í 1. flokki kvenna eru tveir keppendur og þar er allt í járnum eftir fyrsta daginn:
- Ragnheiður Svava Björnsdóttir 86 högg
- Embla Sigrún Arnsteinsdóttir 87 högg
Fjórtán keppendur eru í 1. flokki karla. Efstu menn:
- Þorsteinn Már Þorvaldsson 77 högg
- Ingi Torfi Sverrisson 77 högg
- Jón Svavar Árnason 79 högg
- Gunnar Aðalgeir Arason 79 högg
Í 2. flokki kvenna eru þrír keppendur.
- Einrún Ósk Magnúsdóttir 96 högg
- Ragnhildur Jónsdóttir 102 högg
- Lísbet Hannesdóttir 104 högg
2. flokkur karla er mjög fjölmennur, alls 27 keppendur. Þrír eru efstir og jafnir:
- Valdimar Þengilsson 82 högg
- Guðni Þór Björnsson 82 högg
- Sigurður Pétur Ólafsson 82 högg
3. flokkur karla er fjölmennasti flokkurinn í ár en þar eru 29 keppendur mættir til leiks: Efstu menn:
- Ólafur Elís Gunnarsson 88 högg
- Einar Ingimundarson 89 högg
- Stefán Sigurður Hallgrímsson 89 högg
Níu keppendur eru í 4. flokki karla. Efstir að afloknum fyrsta keppnisdegi:
- Stefán Bjarni Gunnlaugsson 100 högg
- Snæbjörn Þ. S. Kjerúlf 100 högg
- Maron Pétursson 102 högg
Í 5. flokki karla er leikin punktakeppni en ekki höggleikur og þar eru átta keppendur. Staðan í flokknum liggur ekki fyrir, því ekki eru skor allra keppenda komin inn á mótsvefinn.
Í öldungaflokki karla 70 ára og eldri eru ellefu kappar og efstir eru:
- Heimir Jóhannsson 76 högg
- Guðmundur E. Lárusson 80 högg
- Birgir Ingvason 88 högg
Þá er einnig keppt í flokki 14 ára og yngri og þar eru 9 keppendur skráðir til leiks en ekki er búið að skrá skor þeirra allra inn á mótavefinn.
Heildarstöðu í öllum keppnisflokkum má sjá á þessari síðu.
Keppni á Akureyrarmótinu verður fram haldið á golfvellinum að Jaðri á morgun og eru allir velkomnir þangað til að fylgjast með bestu kylfingum Akureyrar etja kappi.
