Áætlunarflug á ný til Kaupmannahafnar?

Þýskur athafnamaður hyggst endurvekja flugfélagið Niceair og hefja áætlunarflug á milli Akureyrar og Kaupmannahafnar á nýjan leik um miðjan febrúar í vetur. Fjölmiðlar fengu í morgun sent boð um blaðamannafund vegna málsins í næstu viku en frekari upplýsingar fást ekki að svo stöddu. 

Flugfélagið Niceair var stofnað á Akureyri snemma árs 2022 og hóf áætlunarflug til Kaupmannahafnar í maí það ár en félagið hætti störfum ári síðar. Var þá tekið til gjaldþrotaskipta. Þjóðverjinn sem hyggst endurvekja félagið, Martin Michael, mun hafa unnið fyrir Niceair um tíma.