Íþróttir

31 íþróttamaður verið heiðraður síðan 1979

Skapti Hallgrímsson - skapti@akureyri.net 29.01.2026 kl. 10:00

Gunnar Gíslason, handknattleiks- og knattspyrnumaður úr KA, var íþróttamaður Akureyrar 1979, þegar kjörið fór fyrst fram. Nanna Leifsdóttir, „skíðadrottning Íslands“, var fyrst kvenna kjörin íþróttamaður Akureyrar og hlaut nafnbótina þá tvö ár í röð, 1982 og 1983.

Besta íþróttafólk Akureyrar á síðasta ári verður heiðrað í dag eins og akureyri.net greindi frá í morgun. Allir eru velkomnir í hóf sem Íþróttabandalag Akureyrar og Akureyrarbær standa fyrir í menningarhúsinu Hofi og hefst klukkan 17.30.

Þetta er í 47. skipti sem Íþróttamaður Akureyrar er kjörinn. Fyrsta kjörið fór fram 1979, einn íþróttamaður var kjörinn árlega til 2015 en síðan þá hafa tveir verið heiðraðir, karl og kona.

Alls hefur 31 íþróttamaður hlotið sæmdarheitið, oftast allra Vernharð Þorleifsson júdókappi úr KA, sem sjö sinnum sem kjörinn Íþróttamaður Akureyrar. Á meðan einn íþróttamaður var kjörinn árlega varð karl 21 sinni fyrir valinu en kona 16 sinnum.

Fyrstu þrettán árin voru átta karlar kjörnir en fimm konur. Þá tók við tímabil þar sem karlar einokuðu kjörið: karl varð fyrir valinu 10 ár í röð, þar af Vernharð Þorleifsson sjö sinnum. Frá 2006 til 2014 snerist dæmið við og kona var kjörin íþróttamaður ársins níu ár í röð!

Vernharð Þorleifsson hlaut nafnbótina Íþróttamaður Akureyrar sjö sinnum, langoftast karla, og Bryndís Rún Hansen hefur verið kjörin oftast kvenna – einu sinni eftir að farið var að kjósa bæði karl og konu en þrisvar áður.

ÍÞRÓTTAKONA OG ÍÞRÓTTAKARL AKUREYRAR

2024 Sandra María Jessen, knattspyrna – Alex Cambray Orrason , kraftlyftingar
2023 Sandra María Jessen, knattspyrna – Baldvin Þór Magnússon, frjálsíþróttir
2022 Hafdís Sigurðardóttir, hjólreiðar – Nökkvi Þeyr Þórisson, knattspyrna
2021 Aldís Kara Bergsdóttir, listhlaup – Brynjar Ingi Bjarnason, knattspyrna
2020 Aldís Kara Bergsdóttir, listhlaup – Viktor Samúelsson, kraftlyftingar
2019 Aldís Kara Bergsdóttir listhlaup – Viktor Samúelsson, kraftlyftingar
2018 Hulda B. Waage, kraflyftingar – Viktor Samúelsson, kraftlyftingar
2017 Stephany Mayor, knattspyrna – Tryggvi Snær Hlinason, körfuknattleikur
2016 Bryndís Rún Hansen, sund – Viktor Samúelsson, kraftlyftingar

Knattspyrnumenn og frændur kjörnir bestir. Frá vinstri: Brynjar Ingi Bjarnason KA (2021), Halldór Ómar Áskelsson Þór (1984 og 1987) og Nökkvi Þeyr Þórisson KA (2022).

Egill Áskelsson, lengi bóndi á Hléskógum í Höfðahverfi, er afi Halldórs Ómars og langafi Nökkva Þeys.
Þórir Guðmundur Áskelsson, faðir Nökkva Þeys, er bróðir Halldórs Ómars.
Bjarni Áskelsson, bróðir Egils, sjómaður og útgerðarmaður á Grenivík, er langafi Brynjars Inga. Sem sagt; langafar Nökkva Þeys og Brynjars Inga voru bræður.

ÍÞRÓTTAMAÐUR AKUREYRAR