Fara í efni
Mannlíf

Þór skoraði loksins en tapaði enn

Tæpt var það! Elmar Þór Jónsson sendir fyrir markið undir lok leiksins og Jóhann Helgi Hannesson, se…
Tæpt var það! Elmar Þór Jónsson sendir fyrir markið undir lok leiksins og Jóhann Helgi Hannesson, sem kom boltanum í markið, var dæmdur rangstæður. Ljósmynd: Skapti Hallgrímsson.

Þórsarar töpuðu 2:1 fyrir Selfyssingum í síðasta heimaleik sumarsins í Lengjudeildinni í knattspyrnu, næst efstu deild Íslandsmótsins.  Þeir eru því enn 20 stig í þriðja neðsta sæti fyrir lokaumferðinni, en eru endanlega öruggir með að halda sér í deildinni þar sem Þróttarar töpuðu í dag.

Helst bar til tíðinda í dag að Þór skoraði. Eftir að gestirnir komust í 2:0 gerði Ólafur Aron Pétursson glæsilegt mark með skoti beint úr aukaspyrnu á 45. mínútu - en Þórsarar höfðu ekki skorað í sjö deildarleikjum í röð þar til í dag.

Jóhann Helgi Hannesson var annars maður dagsins; þessi markahæsti leikmaður Þórs frá upphafi fékk blómvönd fyrir leik í tilefni þess að þetta er síðast leikur hans með Þór á heimavelli. Aðeins er einn leikur eftir, gegn Þrótti á útivelli, og skórnir fara upp í hillu í haust. Jóhann Helgi kom boltanum tvisvar í mark Selfyssinga í leiknum en hvorugt var talið; dæmt var brot á einn samherja Jóhanns þegar hann skallaði boltann í netið í seinni hálfleik og á lokaandartökunum töldu margir að hann hefði jafnað, en þá var framherjinn dæmdur rangstæður. Það var ansi tæpt, eins og sjá má á meðfylgjandi mynd.

Smelltu hér til að sjá leikskýrsluna.