Birki myndaði samfellda skóga við landnám

„Þegar norrænir landnámsmenn komu til Íslands seint á 9. öld okkar tímatals komu þeir að skógivöxnu landi. Aðeins ein tegund myndaði þá samfellda skóga á landinu. Það var birki eða Betula pubescens.“ 

Þannig hefst pistill dagsins í þeirri stórfróðlegu og skemmtilegu röð, Tré vikunnar sem Sigurður Arnarson heldur úti á vef Skógræktarfélags Eyfirðinga. Sigurður heldur áfram:

„Aðrar tegundir, sem mynduðu tré á Íslandi á þessum tíma, voru reynir, Sorbus aucuparia, gulvíðir, Salix phylicifolia og blæösp, Populus tremula. Engin þeirra er talin hafa myndað stóra, samfellda skóga en allar voru þær hluti af birkivistkerfinu. Allar þessar tegundir þekktu landnemarnir frá heimkynnum sínum.“

Sigurður segir þetta sama birki algengustu trjátegund landsins „en ólíklegt er að það líti allt út eins og það gerði við landnám. Að auki er ilmbirki, eins og tegundin er kölluð til aðgreiningar frá öðru birki, algengasta tegund sinnar ættkvíslar í Evrópu og vesturhluta Asíu. Því er sjálfsagt að beina kastljósinu dálítið að tegundinni.“

Í dag fjallar Sigurður almennt um trjátegundina og boðar fleiri pistla. Vel má vera, segir hann, að fleiri pistlar birtist um fjölbreytileika birkisins og notkun þess bæði hér á landi og í útlöndum. Því megi líta á þennan sem inngangspistil að umfjöllun um birki á Íslandi.

Meira hér: Ilmbirki heima og erlendis