Fara í efni
Íþróttir

Handboltinn af stað: KA mætir Haukum í kvöld

Jónatan Magnússon og lærisveinar hans í KA mæta Haukum í Hafnarfirði í kvöld. Ljósmynd: Skapti Hallgrímsson

Íslandsmótið í handbolta hófst í gærkvöldi með fjórum leikjum í efstu deild karla, Olís deildinni. KA-menn hefja leik í kvöld þegar þeir mæta Haukum á Ásvöllum í Hafnarfirði. Leikurinn hefst klukkan 19.30 og verður í beinni útsendingu á Stöð 2 Sport.

KA var í vikunni spáð 9. sæti í Olís deild karla og KA/Þór var spáð 5. sæti í Olís deild kvenna í árlegum samkvæmisleik, þar sem þjálfarar, leikmenn og forráðamenn liðanna spá í spilin.

Val er spáð sigri bæði í karla- og kvennaflokki. Vert er að geta þess að aðeins aðeins munar einu stigi á Fram og KA í spánni fyrir karladeildina í þessum árlega samkvæmisleik; Fram er spáð áttunda sæti, því síðasta sem gefur sæti í úrslitakeppninni.

Karlalið Þórs leikur í Grill 66 deild Íslandsmótsins, næstu efstu deild, og er spáð 3. sæti.

Olís deild kvenna hefst í næstu viku. Fyrsti leikur Þórs/KA er gegn ÍBV í Vestmannaeyjum annan laugardag. Keppni í Grill 66 deildinni hefst föstudaginn 23. september þegar Þór tekur á móti Fjölni í Höllinni á Akureyri.

Spáin fyrir Olís-deild karla:

  • Valur (346 stig)
  • ÍBV (328 stig)
  • Stjarnan (291 stig)
  • FH (270 stig)
  • Haukar (244 stig)
  • Afturelding (211 stig)
  • Selfoss (169 stig)
  • Fram (159 stig)
  • KA (158 stig)
  • Grótta (100 stig)
  • Hörður (58 stig)
  • ÍR (40 stig)