„Sex stiga leikur“ KA gegn FH syðra í dag
KA sækir FH heim í Kaplakrika í Hafnarfirði í dag í gríðarlega mikilvægum leik fyrir bæði lið í botnbaráttu Bestu deildar karla, efstu deildar Íslandsmótsins í knattspyrnu. ÍA er neðst með 12 stig en KA, ÍBV og FH koma næst með 15. KA telst í næst neðsta sæti vegna lakari marktölu en hin tvö. Því má segja að um sé að ræða einn hinna svokölluðu „sex stiga leikja“ – nái annað hvort liðið að sigra í dag stendur það betur í baráttu þeirra tveggja.
- Besta deild karla í knattspyrnu
Kaplakrikavöllur kl. 16:00
FH - KA
Leikurinn í dag markar upphaf 15. umferðar deildarinnar. Framundan eru ekki síður mikilvægir leikir KA í baráttunni, því þrír af næstu fjórum eru gegn liðum á svipuðum slóðum í deildinni. Í næstu umferð fær KA lærisveina Lárusar Orra Sigurðssonar í ÍA í heimsókn, því næst sækja KA-strákarnir Íslandsmeistara Breiðabliks heim, þá kemur ÍBV í heimsókn og loks leikur KA gegn Aftureldingu í Mosfellsbæ.
Fyrri leikur KA og FH í deildinni var á Greifavelli KA 27. apríl í fjórðu umferð deildarinnar og KA-menn fögnuðu þá fyrsti sigri sumarsins, 3:2.
Leikurinn í apríl var bráðskemmtilegur. Hrannar Björn Steingrímsson náði forystu fyrir KA með glæsilegu skoti fyrir utan vítateig snemma leiks; það var þriðja mark bakvarðarins í efstu deild og það fyrsta í sex ár! FH jafnaði eftir hálftíma leik, Ívar Örn Árnason kom KA yfir á ný þegar klukkutími var liðinn en KA-maðurinn Rodri varð fyrir því óláni að gera sjálfsmark á 83. mínútu. Stuðningsmönnum KA leist þá ekki á blikuna en tóku gleði sína á ný aðeins mínútu síðar þegar Bjarni Aðalsteinsson gerði sigurmarkið.
Leikur FH og KA verður sýndur á SÝN Sport (áður Stöð2 Sport).
