Schulte-merkisdagur á Minjasafninu í dag
Boðið er til sérstakrar dagskrár á Minjasafninu á Akureyri í dag í tilefni þess að Þjóðverjinn Karl-Werner Schulte afhendir nú síðustu kortin í Íslandskortasafnið sem varðveitt er á Akureyri. Dagskráin hefst kl. 17, sýningin Land fyrir stafni verður þá formlega opnuð og safnið verður opið til kl. 20. Allir eru velkomnir, aðgangur er ókeypis og boðið verður upp á léttar veitingar.
Sýningin, Land fyrir stafni, er unnin úr Íslandskortasafni Schulte, sem dr. Karl-Werner og eiginkona hans dr. Gisela Schulte-Daxbök hafa fært Akureyrarbæ frá árinu 2014. Safnið telur nú 212 kort frá árunum 1507–1849, eftir marga helstu kortagerðarmenn Evrópu fyrri alda. Í safninu er að finna fjölmörg kort sem ekki er vitað til að séu varðveitt annars staðar, sem gerir það einstakt á heimsvísu.
Karl-Werner fagnar 80 ára afmæli sínu í dag og vildi marka tímamótin með því að færa safninu þessa lokagjöf.
Hjónin færðu Akureyrarbæ fyrstu Íslandskortin að gjöf árið 2014, þegar þessi mynd var tekin. Frá vinstri: Eiríkur Björn Björgvinsson, þáverandi bæjarstjóri á Akureyri, Karl-Werner Schulte, Gisela Schulte-Daxbök og Haraldur Þór Egilsson, safnstjóri á Minjasafninu. Mynd: Skapti Hallgrímsson.
Karl-Werner og Gisela komu fyrst til Akureyrar árið 1971 og oft síðan, m.a. í brúðkaupsferðinni 1976. Hjónin heilluðust svo af bænum að þau ákváðu að hér skyldu þau lögð til hinstu hvílu. Gisela lést 2019 og er jarðsett í Lögmannshlíðarkirkjugarði, þangað sem leið eiginmannsins liggur þegar þar að kemur.
Elsta þekkta prentaða kort af Íslandi
Meðal þátttakenda í dagskránni í dag verða Clarissa Duvigneau, sendiherra Þýskalands, og Gunnar Már Gunnarsson, forseti bæjarstjórnar, sem tekur formlega við kortunum fyrir hönd Akureyrarbæjar. Þá kemur Wolfgang Crom frá Ríkisbókasafninu í Berlín sérstaklega til Akureyrar og fjallar um eintak af korti eftir Ortelius, sem stundum hefur verið kallað Guðbrandskortið.
„Á sýningunni Land fyrir stafni gefur að líta einstök kort af Íslandi frá 16. öld. Þar er þýskt kort með safnnúmerið 200 sérstaklega áhugavert, en á því birtist elsta þekkta prentaða kortið af Íslandi, frá árinu 1507. Það er merkilegt að Ísland hafi ratað á prentað kort aðeins tæpum 60 árum eftir að prenttæknin ruddi sér til rúms í Evrópu — löngu áður en Guðbrandsbiblía kom út árið 1584,“ segir í tilkynningu frá Minjasafninu.
„Kortasafnið sýnir sögu vísindalegrar þekkingar á Íslandi og þróun evrópskrar kortagerðar í gegnum aldirnar. Um leið er það persónuleg saga hjóna sem tóku ástfóstri við Ísland og Akureyri. Það sem hófst sem ferðalag og áhugi varð að einstöku safni sem nú er varðveitt sem heild — öðrum til ánægju og gagns.“
- Gestir geta einnig skoðað aðrar sýningar safnsins, þar á meðal Í hers höndum, sem var opnuð á laugardaginn. Þar er fjallað um veru breskra, bandarískra, norskra og kanadískra hermanna í Eyjafirði í seinni heimsstyrjöldinni.
