Fara í efni
Fréttir

KA/Þór dróst gegn Elche frá Spáni

Leikmenn KA/Þórs fagna sæti í næstu umferð Evrópukeppninnar eftir öruggan sigur á KHF Istogu í Kósóv…
Leikmenn KA/Þórs fagna sæti í næstu umferð Evrópukeppninnar eftir öruggan sigur á KHF Istogu í Kósóvó á dögunum. Ljósmynd: Elvar Jónsteinsson.

Íslands- og bikarmeistarar KA/Þórs mæta spænska liðinu CB Elche í 32-liða úrslitum Evrópubikarkeppninnar í handbolta. Fyrri viðureignin verður heimaleikur KA/Þórs skv. drættinum og er ráðgert að liðin mætist á Akureyri annað hvort 13. eða 14. nóvember og aftur á Spáni viku síðar.

Stelpurnar okkar slógu Kósóvómeistara KHF Istogu út úr keppninni í síðustu umferð með tveimur sigrum í Kósóvó.

Ekki virðist loku fyrir það skotið að báðir leikir fari aftur fram á sama stað í þessari umferð. „KA/Þór lék þó báða leikina gegn Istogu í Kósóvó og kemur í ljós á næstunni hvort liðin komi sér saman um að leika báða leikina á sama stað,“ segir um rimmuna við spænska liðið á vef KA.

Elche er spænskur bikarmeistari og hefur farið vel af stað í spænsku deildinni í vetur, að því fram kemur á heimasíðu KA. Liðið er taplaust; hefur unnið tvo leiki og gert eitt jafntefli.