Gæslan 100 ára – Þór og Gró á Akureyri

Varðskipið Þór, flaggskip Landhelgisgæslunnar, lagðist að Oddeyrarbryggju á Akureyri í gær og í morgun lenti björgunarþyrlan TF-GRÓ á bryggjunni, steinsnar frá skipinu. Heimsóknin tengist bæði málþingi um leit- og björgun á norðurslóðum sem verður í Háskólanum á Akureyri í dag frá kl. 13.00 til 17.00 – og er í beinu streymi hér á akureyri.net – og 100 ára afmæli Gæslunnar.

Í tilefni aldarafmælis Landhelgisgæslunnar verður opið „hús“ í varðskipinu á laugardag. „Íbúum á Akureyri og öðrum áhugasömum er boðið að koma um borð í skipið laugardaginn 18. apríl milli kl. 13:00 og 16:00. Við hvetjum sem flesta að koma um borð og kynna sér starfsemina sem þar fer fram,“ segir í tilkynningu frá Landhelgisgæslunni.

Börn á miðstigi grunnskóla bæjarins fá forskot á sæluna; þau fá að fara um borð í skipið og skoða. Krakkar úr Brekkuskóla voru þar í morgun þegar akureyri.net leit við, og hópnum stóð einnig til boða að skoða þyrlun; hún vekur jafnan mikla athygli og svo var einnig nú.

Þorbjörg Sigríður Gunnlaugsdóttir dómsmálaráðherra kom til Akureyrar með þyrlunni í morgun og skoðaði auk þess varðskipið. Hún er ein þeirra sem flytur á málþinginu sem nefnt var að ofan.