Dagþjónusta geðdeildar SAk flyst í miðbæinn

Nú standa yfir flutningar á hluta af dag- og göngudeildarþjónustu geðdeildar Sjúkrahússins á Akureyri (SAk) í nýtt húsnæði að Hafnarstræti 97, 6. hæð. Þjónustan var áður til húsa í Seli, vestan aðalbyggingar SAk, en greint var frá því á vefsíðu SAk sl. haust að greinst hefði mygla í húsnæðinu og aðgerða væri þörf.

Fram kemur í frétt á vefsíðu SAk að sú starfsemi sem flyst nær til allrar dagþjónustu sem sinnir bæði legudeildar- og göngudeildarsjúklingum, sem og hluta af göngudeildarþjónustu og að flutningarnir muni hafa tímabundin áhrif á þjónustu. Tekið er fram að flestir sjúklingar í dagþjónustu á göngudeild hafi þegar fengið boðun í viðtöl á næstu vikum á nýjum stað.