Við getum bara sjálfum okkur um kennt
„Við áttum að vera búnir að skora löngu áður en þeir fengu vítaspyrnuna svo við getum bara sjálfum okkur um kennt,” sagði Atli Sigurjónsson, reyndasti leikmaður Þórs, við akureyri.net eftir ósigurinn gegn KA í Bestu deild karla í fótbolta á nýja Þórsvellinum í dag.
KA vann leikinn 1-0 þar sem Hallgrímur Mar Steingrímsson skoraði sigurmarkið úr vítaspyrnu rétt fyrir leikslok en Þórsarar höfðu þá fengið fleiri marktækifæri í opnum baráttuleik Akureyrarliðanna frammi fyrir tæplega tvö þúsund áhorfendum.
„Úrslitin eru klárlega mjög mikil vonbrigði, sérstaklega eins og leikurinn spilaðist. Mér fannst við eiga þennan leik nánast allan tímann, alveg þar til þeir fengu vítið nokkrum mínútum fyrir leikslok. Það var mjög svekkjandi að vera þá ekki búnir að klára þetta sjálfir. Við fengum nóg af sénsum til þess, þetta var bara klaufaskapur hjá okkur,” sagði Atli, sem sjálfur fékk eitt besta færi Þórs snemma í leiknum.
Atli ræðir við Ívar Orra Kristjánsson dómara í dag á meðan Einar Freyr Halldórsson stillir boltanum upp fyrir aukaspyrnu.
Þurfum að hrista þetta af okkur
Hann kvaðst vera tiltölulega sáttur við byrjun nýliðanna á þessu Íslandsmóti en Þór er með sex stig eftir fimm umferðir, liðið hafði unnið Val og Fram en tapað fyrir KR og Breiðabliki áður en kom að Akureyrarslagnum í dag.
„Takturinn í liðinu hefur bara verið mjög fínn. Við erum búnir að sækja mikilvæg stig en inn á milli hafa komið erfiðar stundir, eins og við er að búast hjá nýliðum. Við þurfum bara að hrista þetta af okkur, láta ekki berja okkur niður og halda áfram,” sagði Atli.
Aldrei upplifað svona leik áður
Gríðarleg stemning var á Þórsvellinum í dag þar sem áhorfendur settu mikinn svip á viðureign liðanna, sem var sú fyrsta þeirra á milli í efstu deild í 24 ár. Atli kvaðst aldrei hafa upplifað leik sem þennan á Íslandi og er hann þó á sínu nítjánda ári í meistaraflokki og hefur tvisvar orðið Íslandsmeistari og tvisvar bikarmeistari með KR.
Stemningin á leiknum var frábær. „Að mæta í leikinn og heyra áhorfendur syngja um þig áður en þú nærð að klæða þig í íþróttafötin. Ég hef aldrei nokkurn tíma lent í þessu áður,“ segir Atli Sigurjónsson.
„Stigin voru í raun algjört aukaatriði. Það hefði ekki þurft að gefa stig fyrir þennan leik, það hefði verið alveg jafn mikil barátta þrátt fyrir það. Fyrir utan úrslitin var mjög gaman að taka þátt í þessum leik. Frábærir áhorfendur og mjög gaman að sjá alla umgjörðina.
Það er ógeðslega svekkjandi að leikurinn skyldi þurfa að enda svona því þetta var frábær dagur í alla staði. Að mæta í leikinn og heyra áhorfendur syngja um þig áður en þú nærð að klæða þig í íþróttafötin. Ég hef aldrei nokkurn tíma lent í þessu áður.”
Látum ekki berja okkur niður
Hann kvaðst staðráðinn í að láta úrslitin í dag ekki hafa áhrif á framhaldið hjá Þórsliðinu.
„Nú er það bara áfram gakk. Við látum þetta ekki berja okkur niður og mætum stórir í næsta leik. Við eigum Víkinga næst og það verður gríðarlega erfiður leikur þar sem við þurfum að vera klárir í slaginn,” sagði Atli sem sneri aftur á heimaslóðirnar á Akureyri í vetur en hann lék fyrir sunnan, lengst af með KR, frá 2012 til 2025, að undanskildu hálfu tímabili með Þór fyrir níu árum.
Eins og ég hafi aldrei farið
„Þetta er bara eins og ekkert hafi breyst. Ég er kominn aftur í sjöuna, kominn aftur inn til mömmu og pabba, tímabundið, og það er eins og ég hafi aldrei farið,” sagði Atli Sigurjónsson um heimkomuna en hann er í hópi reyndustu leikmanna Bestu deildarinnar og lék sinn 260. leik í deildinni í dag.
