Þór fær Dagbjart Búa lánaðan frá KA

Þór hefur fengið knattspyrnumanninn Dagbjart Búa Davíðsson lánaðan frá KA út þetta keppnistímabil. Hann er 19 ára miðju- eða sóknarmaður.

Dagbjartur Búi hefur lítið sem ekkert komið sögu hjá KA í Bestu deildinni í sumar; hann hefur aðeins leikið í fjórar mínútur skv. vef KSÍ. Kom inn á í blálokin í markalausu jafntefli gegn ÍBV í Vestmannaeyjum um miðjan maí. Þá lék hann síðasta hálftímann í 4:0 sigri KA á KF í 32-liða úrslitum bikarkeppni KSÍ og gerði eitt markanna.

Dagbjartur Búi var fyrirliði 2. flokks sameiginlegs liðs KA, Dalvíkur, Magna, KF og Hattar sem varð Íslandsmeistari á síðasta ári.