Bæring Nói sigraði í Söngkeppni MA

Bæring Nói Dagsson bar sigur úr býtum í árlegri Söngkeppni Menntaskólans á Akureyri sem haldin var í Kvosinni í MA í gærkvöld. Hann flutti Er alveg sjúkur í þig, sem er texti sem hann samdi ásamt vinum sínum við lagið Teenage Dirtbag eftir Wheatus – en auk þess að vinna keppnina fagnaði Bæring Nói 17 ára afmæli sínu í gær!

Íris Alma Kristjánsdóttir varð í öðru sæti með lagið Einhver og Heiðdís Pála Áskelsdóttir hreppti 3. sætið fyrir flutning sinn á laginu This is a Mans World. Að auki ákvað dómnefndin að veita Elvari Birni Ólafssyni verðlaun fyrir 4. sætið fyrir flutning sinn á laginu Easier Said Than Done.

Áhorfendur kusu vinsælasta atriðið og þar fengu Bergrós Ásta Guðmundsdóttir og Hafrún Linda Guðmundsdóttir flest atkvæði en þær fluttu lagið Elektrisk. 

Bæring Nói verður því fulltrúi MA í Söngkeppni framhaldsskólanna í vor.

Í frétt á vef MA kemur fram að undirbúningur keppninnar hafi staðið yfir undanfarnar vikur og öllu hafi verið tjaldað til þegar Kvosinni var breytt í tónleikahöll. Alls voru 18 atriði skráð til leiks og sá húsbandið um undirleik.

Dómnefndin var skipuð leikurum úr leiksýningunni Birtíngi, sem Leikfélag Akureyrar frumsýnir innan skamms.

Keppnin var sýnd í beinni útsendingu á YouTube og þar er hægt að horfa og hlusta á keppnina í heild.