Akureyrarveikin og ME-sjúkdómurinn

Annar fyrirlestur í röðinni Fortíðin í nýju ljósi! verður á Minjasafninu á Akureyri í dag kl. 17.00. Sá fyrsti var fyrir sléttri viku þegar dr. Guðni Th. Jóhannesson, fv. forseti Íslands, fjallaði um Othello slaginn á Akureyri og fleiri þorskastríðssögur, fyrir fullum sal en í dag tefla saman fortíð og nútíð þeir Óskar Þór Halldórsson rithöfundur og Friðbjörn Sigurðsson læknir. Í fyrirlestri velta þeir upp ýmsu er tengir Akureyrarveikina og ME-sjúkdóminn.

Akureyrarveikin var skæður sjúkdómur sem herjaði á Akureyringa og fjölmarga aðra um allt land veturinn 1948 til 1949. Veikin stakk sér aftur niður sex árum síðar, veturinn 1955-1956, á Vestfjörðum og í Þistilfirði. Aldrei hefur verið upplýst hvers konar veikindi þetta voru en allt bendir til þess að um hafi verið að ræða veirusýkingu af einhverjum toga.

„Það hefur komið í ljós að sláandi líkindi eru með afleiðingum Akureyrarveikinnar og langvarandi eftirköstum COVID 19 og ME-sjúkdómnum. Þetta kemur skýrt fram í bók Óskars Þórs Halldórssonar um Akureyrarveikina sem kom út á síðasta ári og hefur vakið mikla athygli. Til einföldunar má segja að Akureyrarveikin hafi verið ME-sjúkdómur þess tíma,“ segir í tilkynningu frá Minjasafninu.

Friðbjörn Sigurðsson læknir við Akureyrarklíníkina, sem er þjónustumiðstöð fyrir fólk með ME-súkdóminn eða langvarandi einkenni COVID, þekkir vel einkenni ME-sjúkdómsins og hversu útbreiddur hann er í okkar samfélagi á Íslandi og út um allan heim.

• Fyrirlestrarnir í þessari spennandi röð verða allir í Minjasafninu á Akureyri. Þeir hefjast allir kl. 17.00 og aðgangur er ókeypis.

Næstu viðburðir:

• 19. febrúar – Spegill þjóðar - fréttamyndir í 50 ár og sagan á bakvið þær; Gunnar V. Andrésson og Sigmundur Ernir Rúnarsson.
• 5. mars – Ilmur, angan og fnykur: Ýmis lykt í íslenskum heimildum frá 19. og 20. öld; Ragnhildur Björt Björnsdóttir, sagnfræðingur.
• 12. mars – Strá fyrir straumi. Ævi Sigríðar Pálsdóttur (1809–1871) og brotakenndar heimildir; dr. Erla Hulda Halldórsdóttir.
• 19. mars – Skreytingar í handritum síðari alda og þáttur af einum norðlenskum listaskrifara; Kjartan Ísleifsson, sagnfræðingur