Skógarböðin
Þórsarar taka á móti Selfyssingum í kvöld
23.10.2025 kl. 06:00
Daniel Birkelund þjálfari Þórs og lærisveinar hans fá Selfyssinga í heimsókn í kvöld. Í baksýn er markvörðurinn Nikola Radovanovic. Mynd: Skapti Hallgrímsson
Karlalið Þórs í handbolta hefur verið dálítið brokkgengt í upphafi efstu deildar Íslandsmótsins, Olís deildarinnar, verið nálægt því að vinna Val á heimavelli, tók stig á móti FH á útivelli í leik sem hefði getað unnist, en tapaði síðan með átta marka mun fyrir HK í Höllinni í liðinni viku. Þórsarar voru jafnir HK að stigum fyrir 7. umferðina, en sátu eftir í 11. sæti, því næstneðsta í deildinni, eftir tapið fyrir HK. Nú er strax komið að öðrum heimaleik þegar Selfyssingar mæta í Höllina í dag.
- Olísdeild karla í handknattleik
Íþróttahöllin á Akureyri kl. 18:30
Þór - Selfoss
Selfyssingar eru með stigi meira og eru sæti ofar en Þór, hafa unnið tvo leiki og gert eitt jafntefli, en Þórsarar hafa aðeins unnið einn leik hingað til og gert tvö jafntefli. Selfoss tapaði með fimm marka mun fyrir FH á heimavelli í síðustu umferð.
