10,6 milljónir til að laga gönguleiðina að Básavík

Grímsey hefur hlotið styrk frá Framkvæmdasjóði ferðamannastaða upp á 10,6 milljónir króna til að bæta aðgengi og öryggi á einni vinsælustu gönguleið eyjunnar – leiðinni að heimskautsbaugstákninu við Básavík.

Á vef Akureyrarbæjar segir að með verkefninu verði gönguleiðin lagfærð þar sem hún liggur um blautt mólendi þar sem stórir drullupollar hafa torveldað umferð og skapað slysahættu. Lögð verða dren undir stíginn til að stýra vatnsflæði og draga úr pollamyndun, auk þess sem dældir verða fylltar og stígurinn jafnaður. Markmiðið er að gera leiðina þurrari, öruggari og aðgengilegri fyrir bæði ferðamenn og heimamenn.

Jafnframt verður sett upp upplýsingaskilti við Básavík sem fræðir gesti um lundann og varar við hættunni sem skapast getur vegna lundahola við bjargbrúnir.