Grímsey
Óánægja með þjónustu við Grímseyinga
01.06.2023 kl. 17:15
![](/static/news/lg/saefari-grimsey-2.jpg)
Bæjaryfirvöld á Akureyri eru óánægð með þjónustu Vegagerðarinnar við Grímseyinga. Ferjan Sæfari er enn í slipp og og flug hefur ekki verið með viðunandi hætti, að mati bæjarráðs.
Bergþóra Kristinsdóttir, framkvæmdastjóri þjónustusviðs Vegagerðarinnar og Halldór Jörgensson forstöðumaður hjá stofnuninni mættu á fund bæjarráðs Akureyrar í morgun í gegnum fjarfundarbúnað og fóru yfir stöðu mála varðandi samgöngur til og frá Grímsey.
Í fundargerð bæjarráðs segir:
Bæjarráð Akureyrar lýsir yfir vonbrigðum með þjónustu Vegagerðarinnar við íbúa Grímseyjar. Ítrekaðar seinkanir hafa orðið á viðgerð Grímseyjarferjunnar Sæfara og skort hefur á viðvarandi flug meðan á henni stendur. Þetta þýðir mjög skerta þjónustu við eyjarskeggja og bitnar harkalega á ferðaþjónustunni í eyjunni sem reiðir sig algjörlega á sumarmánuðina í rekstri. Bæjarráð skorar á Vegagerðina að bæta upplýsingagjöf til farþega, bæði á íslensku og ensku, fjölga flugferðum og tryggja hagstæð flugfargjöld meðan á viðgerðum á ferjunni stendur.
Í upphaflegri útgáfu fréttarinnar sagði að Bergþóra Þorkelsdóttir forstjóri Vegagerðarinnar hefði tekið þátt í fundinum en það var nafna hennar Kristinsdóttir.