Gervigreind - pistlar

Margmenni sótti hátíðarmessuna

Skapti Hallgrímsson skrifar 16. nóvember 2025 | kl. 19:00

Gengið úr kirkju í dag. Séra Hildur Eir Bolladóttir, sóknarprestur, til vinstri, og biskup Íslands, sr. Guðrún Karls Helgudóttir, sem prédikaði í hátíðarmessunni. Á milli þeirra er séra Aðalsteinn Þorvaldsson. Myndir: Skapti Hallgrímsson

Bekkurinn var þétt setinn í Akureyrarkirkju í dag þegar fram fór hátíðarmessa í tilefni 85 ára afmælis kirkjunnar sem er á morgun, mánudag; hún var vígð sunnudaginn 17. nóvember árið 1940,

Biskup Íslands, sr. Guðrún Karls Helgudóttir prédikaði í dag og sr. Aðalsteinn Þorvaldsson, sr. Hildur Eir Bolladóttir sóknarprestur og sr. Jóhanna Gísladóttir þjónuðu fyrir altari.

Kór Akureyrarkirkju og Eldri barnakór kirkjunnar sungu við athöfnina í dag en sá fyrrnefndi á einnig stórafmæli í ár; honum var komið á fót fimm árum eftir vígslu kirkjunnar og er því 80 ára. Organistar í dag voru Eyþór Ingi Jónsson, Sigrún Magna Þórsteinsdóttir og Þorvaldur Örn Davíðsson.

Að hátíðarmessunni í dag lokinni héldu margir í Safnaðarheimili kirkjunnar þar sem Kvenfélag Akureyrarkirkju var með kaffihlaðborð og lukkupakkasölu.

Meira um hátíðarmessuna síðar.

Í tilefni 80 ára afmælis kirkjunnar, í nóvember 2020, skrifaði séra Svavar Alfreð Jónsson, þáverandi sóknarprestur og nú sjúkrahússprestur, nokkrar greinar um Akureyrarkirkju að beiðni akureyri.net. Þær eru nú birtar aftur, sú fyrsta í gær og önnur í morgun.

Í GÆR – FEGURSTA KIRKJUSTÆÐI HÉRLENDIS OG ERLENDIS
Í MORGUN – KAMARSNIÐ Á TURNINUM EINS OG DÓMKIRKJUNNI

Prestar Akureyrarkirkju ásamt biskup Íslands að messu lokinni í dag. Frá vinstri: sr. Jóhanna Gísladóttir, sr. Hildur Eir Bolladóttir, sr. Guðrún Karls Helgudóttir og sr. Aðalsteinn Þorvaldsson.

Til baka í yfirlit