Víkingar höfðu betur og KA er næst neðst
KA tapaði 2:0 fyrir Víkingi á heimavelli í kvöld í Bestu deildinni, efstu deild Íslandsmótsins í knattspyrnu. KA-menn eru í næst neðsta sæti deildarinnar með 12 stig eftir jafn marga leiki en Víkingar styrktu stöðu sína á toppi deildarinnar með sigrinum.
Nikolaj Hansen gerði fyrra mark Víkinga með frábærum skalla eftir góða aukaspyrnu Gylfa Þórs Sigurðssonar þegar hálftími var liðinn. KA-menn töldu brögð hafa verið í tafli í baráttu varnar- og sóknarmanna þegar Gylfi spyrnti og Nikolaj þess vegna komist óáreittur að boltanum. Voru ósáttir við að ekki var dæmt á Víkinga. Dómarinn sá hins vegar ekkert athugavert.
Jafnvægi hafði verið með liðunum en hvorugt skapað neina verulega hættu fram að markinu. KA ógnaði marki gestanna fljótlega eftir að Víkingar náðu forystu en ekkert varð úr og það er einmitt akkilesarhæll KA-manna undanfarið. Varnarleikurinn var vandamál framan af sumri en nú er eins og liðið geti hreinlega ekki skorað. KA hefur ekki gert nema 10 mörk í 12 leikjum og Ingvar markvörður Víkings þurfti aldrei að taka á honum stóra sínum í kvöld.
Gylfi Þór Sigurðsson innsiglaði sigur Víkings með föstu, hnitmiðuðu skoti utan vítateigs á 69. mínútu.
Eftir leikinn eru Víkingar með 26 stig að 12 leikjum loknum, fjórum stigum meira en Breiðablik, sem mætir Fram á morgun.
KA er með 12 stig úr 12 leikjum og í næst neðsta sæti, sem fyrr segir. ÍA er neðst með 9 stig úr 12 leikjum. KR hefur 13 stig úr 11 leikjum, ÍBV og Afturelding bæði 14 stig úr 11 leikjum og FH 14 stig úr 12 leikjum.
Meira síðar
