Daði sleit hásin, Hafþór og Bjarni hvorugur með

Tveir lykilmenn handboltaliðs KA og einn af burðarásum Þórs eru meiddir og missa af stórleik Akureyrarliðanna í lokaumferð Olísdeildarinnar í kvöld.

• Daði Jónsson fyrirliði KA og grjótharður varnarmaður sleit hásin á æfingu í gærkvöldi og verður lengi frá.
• Stórskyttan Bjarni Ófeigur Valdimarsson hefur glímt við meiðsli undanfarið. Hann kom örlítið við sögu í síðasta leik KA en spilar ekki í kvöld.
• Hafþór Vignisson, örvhenta skyttan frábæra í Þór, meiddist á ökkla í fyrri hálfleiknum í sigurleiknum gegn Aftureldingu í síðustu umferð. Hann lauk þó leiknum en spilar ekki í kvöld.
• Þá er Norðmaðurinn Morten Boe Linder ekki með KA frekar en undanfarið. Hann fór úr axlarlið í leik fyrir skömmu.