Fyrsta tap SA-kvenna kom í Laugardalnum

Kvennalið SA í íshokkí tapaði sínum fyrsta leik á leiktíðinni þegar liðið mætti SR í Skautahöllinni í Laugardal í gærkvöld. Eitt mark leit dagsins ljós og skildi liðin að, þó ekki hafi vantað færin.

Fyrstu tvær loturnar voru markalausar, en engu að síður mikil barátta og nóg af færum, leikurinn fjörugur þó svo bið hafi orðið eftir mörkunum. Það var svo á upphafsmínútum þriðju og síðustu lotunnar sem Ragnhildur Kjartansdóttir skoraði eina mark leiksins með stoðsendingu frá Gunnborgu Petru Jóhannsdóttur, en báðar eru reyndar fyrrum liðsmenn SA. 

Leikmenn SA gerðust sífellt aðgangsharðari þegar leið á þriðju lotuna, en það skilaði pökknum þó ekki í mark Reykvíkinga og niðurstaðan því 1-0 tap, fyrsti tapleikur liðsins í vetur og ekki á hverjum degi sem liðið nær ekki að skora mark. 

SR - SA 1-0 (0-0, 0-0, 1-0)

SR

Mark/stoðsending: Ragnhildur Kjartansdóttir 1/0, Gunnborg Petra Jóhannsdóttir 0/1.
Varin skot: Julianna Thomson 35 af 35 (100%).
Refsingar: 2 mínutur.

SA

Varin skot: 23 af 24 (95,83%).
Refstingar: 2 mínútur.

Tapið skiptir þó engu máli hvað framhaldið varðar, fyrir utan það að gefa SR-ingum aukið sjálfstraust fyrir úrslitaeinvígið sem fram undan er í næsta mánuði. SA hafði þegar tryggt sér deildarmeistaratitilinn og oddaleiksréttinn í einvíginu. Leikurinn var sá fyrsti í Ofurhelgi ÍHÍ þar sem kvennaliðin þrjú mætast öll sömu helgina. SA mætir Fjölni í Egilshöllinni í dag kl. 16:45, en Reykjavíkurfélögin mætast svo á sunnudag.