Birgir Orri Ásgrímsson

25 ára afmælishátíð Norðurorku í dag

Skapti Hallgrímsson skrifar 13. september 2025 | kl. 06:00

Norðurorka var stofnsett árið 2000, með sameiningu Rafveitu Akureyrar og Hita- og vatnsveitu Akureyrar. Síðan eru liðin 25 ár og af því tilefni verður haldin afmælishátíð í dag, laugardaginn 13. september.

Dagskráin verður á tveimur stöðum, fyrst í hreinsistöð fráveitu í Sandgerðisbót og síðan í höfuðstöðvum Norðurorku á Rangárvöllum.

SANDGERÐISBÓT
Klukkan 13.00 - 14.00

Hreinsistöð fráveitu verður loks formlega vígð í dag. „Með tilkomu hreinsistöðvarinnar, sem tekin var í notkun árið 2020, fer fráveituvatn ekki lengur óhreinsað út í sjó auk þess sem áhrifasvæði útrásar er nú minna og fjær ströndu en áður - og því ber að fagna!“ segir í tilkynningu frá Norðurorku.

„Þar sem að stöðin var tekin í notkun á tímum samkomutakmarkana þá langar okkur núna loks að vígja þessa samfélagslegu búbót sem hreinsistöð fráveitu sannarlega er. Því mun fara fram formleg vígsla og kynning á stöðinni.“

RANGÁRVELLIR
Klukkan 14.00 - 16.00

Að vígslu hreinsistöðvarinnar lokinni færist dagskráin að höfuðstöðvum Norðurorku að Rangárvöllum. Í tilkynningu segir að þar verði boðið upp á erindi, lifandi tónlist, hoppukastala, grillaðar pylsur, kaffi og konfekt. Öll ættu að geta fundið eitthvað við sitt hæfi.

Dagskrá erinda sem flutt verða í Orkugarði er sem hér segir:

14.20 Fræðslustarf - Hvernig og hvers vegna
Erla Björg Guðmundardóttir og Valgerðardóttir og Hanna Rún Hilmarsdóttir

14.40 Hvaða tækifæri felast í snjallmælavæðingunni?
Arnaldur B. Magnússon

15.00 Stiklað á stóru úr 25 ára sögu Norðurorku
Gunnur Ýr Stefánsdóttir

15.20 Vatnið í Vaðlaheiðargöngum - nýting nú og síðar
Hjalti Steinn Gunnarsson
15.40 Drægnikvíði – er hægt að hlaða bíl allsstaðar í bænum?
Arnaldur B. Magnússon

Smellið hér til að sjá upplysingar um viðburðinn á Facebook. Öll eru hjartanlega velkomin, segir í tilkynningu frá Norðurorku

Til baka í yfirlit