Fréttir

Vonskuveðri spáð um mest allt land

Skapti Hallgrímsson - skapti@akureyri.net 26.03.2026 kl. 04:00

Töluvert snjóaði á Akureyri i byrjun vikunnar en rjómablíða var hins vegar í gær. Þessi bíll tók á þriðjudag fagnandi á móti ökumanni sem hafði brugðið sér frá í rúma þrjá sólarhringa ... Mynd: Skapti Hallgrímsson

Vonskuveðri er spáð um mest allt land í dag, fimmtudag, einkum á borgarhorninu og Suðurlandi auk Vestfjarða. Gul viðvörun tekur gildi á Norðurlandi eystra klukkan 12 á hádegi og gildir til kl. 20 í kvöld. Ástæðan: spáð er austan og suðaustan 13 til 20 metrum á sekúndu, snjókomu og skafrenningi með slæmu skyggni og versnandi færð, einkum á fjallvegum.

Í gærkvöldi hafði fyrstu flugferð Icelandair frá Reykjavík til Akureyrar verið aflýst.
Á vef Vegagerðarinnar kom fram í gærkvöldi að vegurinn um Öxnadalsheiði yrði á óvissustigi frá því klukkan 6:00 að morgni í dag, fimmtudag, og gæti lokast með stuttum fyrirvara.
Lesendur eru hvattir til að fylgjast með ástandinu á vef Vegagerðarinnar: Umferðin

Á suðvesturhorninu var í gær gefin út appelsínugul viðvörun sem gildir frá því klukkan 6:00 í bítið og fram yfir hádegi. Íbúum á borgarhorninu er ráðlagt að halda sig heima á meðan versta veðrið gengur yfir, reiknað var með að samgöngur yrðu í lamasessi og gert ráð fyrir að öllum stofnvegum að höfuðborgarsvæðinu yrði lokað í nótt, að Reykjanesbraut undanskilinni. Fjölda flugferða frá Keflavík út í heim í morgunsárið hafði verið aflýst í gærkvöldi en nokkrar voru þó enn á áætlun.

Til baka í fréttayfirlit