Fréttir

Verslunarmannahelgi: Hvernig verður veðrið?

Haraldur Ingólfsson - haraldur@akureyri.net 29.07.2025 kl. 10:45

Akureyri er blómlegur bær. Mynd: Haraldur Ingólfsson.

Einn af viðkvæmustu tímum ársins hvað varðar veðurspá er í aðdraganda verslunarmannahelgarinnar. Veðrið hefur áhrif á aðsókn að hátíðum víða um land. Ef stytta ætti veðurspána fyrir næstu daga niður í tvö orð yrði niðurstaðan mögulega: „Komdu norður!“

Vindur úr suðri og væta í dag og á morgun

Samkvæmt veður spá fyrir daginn í dag sem Veðurstofa Íslands gaf út skömmu fyrir kl. 10 má búast við sunnan- og suðaustanátt, 5-13 metrum á sekúndu, hvassast vestantil. Þá verður dálítil væta, en rigning seinnipartinn, nema hvað lengst af verður þurrt á Norðausturlandi. Á morgun er gert ráð fyrir suðvestanátt, 5-10 metrum á sekúndu og skúrum, en þá mun létta til fyrir austan. Hiti verður 10-20 stig, hlýjast norðaustanlands.

Hlýjast norðaustanlands

Veðurspáin fyrir næstu daga, samkvæmt Veðurstofu Íslands:

Fimmtudagur: Vestlæg átt, 3-8 m/sek. Skýjað með köflum og stöku skúrir, en bjartara fyrir austan. Hiti 10 til 18 stig, hlýjast á Suðausturlandi.
Föstudagur: Sunnan 3-8 m/sek., skýjað og smá væta, en bjartviðri á Norðausturlandi. Vaxandi suðaustanátt vestanlands um kvöldið. Hiti 10 til 18 stig, hlýjast norðaustantil.
Laugardagur: Suðaustan 13-20 m/sek., hvassast suðvestantil, og rigning. Talsverð úrkoma um tíma sunnan- og suðaustanlands. Dregur úr vindi seinnipartinn. Hiti 11 til 17 stig.
Sunnudagur: Útlit fyrir suðlæga átt og skúrir. Hiti breytist lítið.
Mánudagur: Útlit fyrir suðlæga átt og skúrir. Hiti breytist lítið.

Á vefnum gottvedur.is, sem rekinn er af Veðurstofu Íslands, má sjá myndrænan samanburð á veðrinu í dag og næstu daga á „helstu stöðum,“ eins og það er orðað á vefnum.

Kaldara við Krossanesbrautina?

Veðurvefur Einars Sveinbjörnssonar veðurfræðings, Blika.is, er bjartsýnn fyrir hönd Norðlendinga. Hér má sjá myndræna spá fyrir næstu daga við Krossanesbrautina, þar sem veðurathugunarstöð Veðurstofu Íslands stendur uppi á opnu holti, skammt frá sjávarbakkanum. Kappsamir Akureyringar hafa reyndar bent á að oft sé kalt við Krossanesbrautina og finnst að Akureyri vegið með því að mæla hitann þar.

Grænt og gult austur á Héraði í dag

Veðursældin virðist færast í austur frá því í gær, að minnsta kosti ef eingöngu er miðað við besta veðrið eins og það er sýnt á korti á vefnum bestavedrid.is. Grænt er á Héraði, besta veðrið á landinu kl. 10 þegar skjámyndin hér að neðan var tekin og næstbest í grennd.