Fara í efni
Íþróttir

Þórsarar klaufar að tapa fyrir Skagamönnum

Smári Jónsson á hraðferð í átt að körfu Akurnesinga í kvöld. Ljósmynd: Skapti Hallgrímsson

Þórsarar töpuðu með þriggja stiga mun, 77:74, fyrir Akurnesingum í Höllinni í kvöld í 1. deild Íslandsmótsins í körfubolta. Þetta var fyrsti heimaleikur Þórsara í vetur.

Heimamenn fóru illa að ráði sínu; höfðu 12 stiga forskot þegar fjórði leikhluti hófst en töpuðu honum 22:9 og því má segja að Þórsarar hafi kastað frá sér sigrinum. Þeir fengu svo síðustu sóknina en náðu ekki að skjóta utan þriggja stiga línunnar til að freista þess að jafna.

Leikstjórnandinn Tarojae Ali-Paishe Brake var stigahæstur Þórsara með 20 stig og Smári Jónsson gerði 14. Toni Cutuk var með flest framlagsstig Þórsara; hann skoraði 12 stig, tók 14 fráköst og átti þrjár stoðsendingar. Fyrir það fékk hann 21 framlagsstig skv. opinberri tölfræði.

Smellið hér til að sjá tölfræðina.