Strandveiðiflotinn: Rafvæðing að hefjast

„Með þessum samningum má segja að rafvæðing íslenska strandveiðiflotans hefjist og það með aðstoð og fjármagni frá Suður-Kóreu,“ segir Kolbeinn Óttarsson Proppé, framkvæmdastjóri fyrirtækisins Grænafls á Siglufirði, um þau tímamót sem verða í dag, miðvikudag, þegar samstarfssamningar Grænafls og suður-kóreskra aðila verða undirritaðir í Grósku í Reykjavík.

Grænafl, verkefni Kolbeins og Freys Steinars Gunnlaugssonar, hefur síðustu misseri unnið að orkuskiptum minni fiskiskipa og með samningnum færist verkefnið yfir á framkvæmdastig. Vinna við fyrsta bátinn, Oddverja SI 76, hefst í kjölfarið en olíuvél hans verður fjarlægð og í staðinn settur suður-kóreskur búnaður sem gerir bátnum kleift að ganga á rafmagni. „Reynslan af verkefninu getur síðan nýst við frekari rafvæðingu íslenska strandveiðiflotans,“ segir í tilkynningu frá Drift, miðstöð frumkvöðla og nýsköpunar, sem stofnuð var á Akureyri í desember 2023.

Auk Grænafls taka íslensku fyrirtækin HS Orka, Rafal og Slippurinn Akureyri þátt í verkefninu.

„Grænafl fékk inngöngu í Drift EA eftir fyrstu Slipptökuna og er í dag hluti af Hlunninum, frumkvöðlaprógrammi Driftar fyrir fyrirtæki sem eru komin af hugmyndastigi og vilja taka næstu skref í uppbyggingu og vexti,“ segir í tilkynningunni frá Drift. „Hjá Drift hefur Grænafl fengið fjárfestingu, aðgang að ráðgjöf, tengslaneti, sérfræðingum og fjárfestingartækifærum sem styðja fyrirtækið við að þróa lausnina áfram og koma henni í framkvæmd.“

„Stórmerkilegt“

Um 20 manna sendinefnd frá Íslandi og Suður-Kóreu var samankomin á Siglufirði á mánudag „þar sem næstu skref voru tekin í verkefni Grænafls við rafvæðingu íslenskra strandveiðibáta,“ segir í tilkynningunni. Meðfylgjandi myndir voru teknar á Siglufirði á mánudaginn. Þar var rætt um rafvæðingu minni fiskiskipa, farið yfir tæknilegar útfærslur og lokahönd lögð á samningana sem undirritaðir verða í dag.

„Við höfum unnið ötullega að fjármögnun hér heima fyrir og vorum svo lánsöm að komast inn í Drift, þar sem við hlutum ómetanlegan stuðning. Við lokuðum síðan fjármögnunarlotu í vor og það losaði um fjármagn erlendis frá sem gerir okkur kleift að komast af undirbúningsstigi og í framkvæmdir. Það er í raun stórmerkilegt að kóresk stjórnvöld séu til í að styðja við rafvæðingu íslensks strandveiðibáts, en það er afrakstur mikillar vinnu síðustu ár,“ segir Kolbeinn Óttarsson Proppé í fyrrnefndri tilkynningu.

Fyrri umfjöllun akureyri.net um Grænafl

• September 2024 – Spennandi verkefni um orkuskipti smábáta
• Mars 2025 – Vinna að orkuskiptum á Íslandi og í Kóreu