Samtímadansverkið 'Hér á ég heima' frumsýnt í Hofi
Í kvöld, 26. apríl, verður þverfaglega samtímadansverkið “Hér á ég heima” frumsýnt í svarta kassanum í menningarhúsinu Hofi á Akureyri. Höfundur verksins og flytjandi er dansarinn og danshöfundurinn Yuliana Palacios. Sýningarnar verða tvær, kl. 19.00 og 20.30. Uppselt er á seinni sýninguna, en einhverjir miðar lausir á þá fyrri.
Í fréttatilkynningu segir að verkið fjalli um áskoranir þess að festa rætur í nýju umhverfi og er óður til innflytjendasamfélagsins á Íslandi auk þess að innihalda krítík á kerfið sem nýir Íslendingar búa við undir ægivaldi Útlendingastofnunar. Yuliana hefur verið búsett á Íslandi síðan 2016 og þekkir vel þá erfiðleika sem stundum felast í flóknu aðlögunarferli á framandi stað. Frá því Yuliana settist að á Íslandi árið 2016 hefur hún unnið ötullega að eigin verkum, oft í samstarfi við aðra dansara og danshöfunda en einnig tónlistar- og myndlistarfólk.
Í dansverkinu er stuðst við ríkulega hljóðmynd auk íburðamikils vídeóverks sem gerir “Hér á ég heima” að sannkallaðri upplifun fyrir sjón og heyrn. Um búninga sjá tískuhúsið Rocinante í Oaxaca í Mexíkó, Fözz Stúdíó í Reykjavík og Ásta Guðmundsdóttir. Jón Haukur Unnarsson semur tónlist og gerir hljóðmynd en myndbandshluti verksins er eftir Yuliönu og Elvar Örn Egilsson.
Nánari upplýsingar um verkið má nálgast HÉR
Verkefnið er stutt af Sviðslistasjóði, Launasjóði listamanna og Verðandi.
