Fara í efni
Íþróttir

Orri Sigurjónsson gengur til liðs við Fram

Orri Sigurjónsson, fyrir miðju, í síðasta heimaleiknum með Þór - 2:0 sigri á HK 14. ágúst í sumar. Ljósmynd: Skapti Hallgrímsson

Knattspyrnumaðurinn Orri Sigurjónsson, sem alltaf hefur leikið með Þór, er genginn til liðs við Fram, sem leikur í efstu deild Íslandsmótsins. Fram tilkynnti þetta í dag.

„Orri hefur skrifað undir tveggja ára samning við Fram og mun þar af leiðandi bætast í leikmannahóp liðsins fyrir komandi tímabil. Orri á 194 leiki að baki á 11 ára ferli með uppeldis félagi sínu Þór Akureyri, þar af tvö tímabil í efstu deild,“ segir í tilkynningu Framara.

Orri er 28 ára gamall og hefur ýmist spilað sem aftasti maður á miðjunni eða í hjarta varnarinnar með Þór. 

Í tilkynningunni segir að Jón Sveinsson, þjálfari Fram og hans menn, séu Orra vel kunnugir „enda hefur hann iðulega æft með okkur yfir vetrarmánuðina. Hann er búsettur erlendis eins og er og mun koma til liðs við strákana í æfingaferðinni í mars mánuði. Við reiknum því með að hann verður klár í slaginn þegar mótið hefst og er góð viðbót í hópinn,“ sagði Agnar Þór Hilmarsson formaður knattspyrnudeildar Fram.