Listasumar hefst með dansiballi í miðbænum

Gilfélagið býður til dansiballs í göngugötunni á Akureyri í kvöld og markar það upphaf Listasumars. Söngvararnir Magni Ásgeirsson og Erna Hrönn Ólafsdóttir halda uppi fjörinu við undirleik hljómsveitar, að því er segir í tilkynningu 

„Drífið fram dansskóna og takið þátt í alvöru balli þegar göngugötunni okkar verður breytt í eitt allsherjar dansgólf,“ segir í hvatningu forkólfa Listasumars. Fjörið hefst klukkan 20.00.

• „Litrík fjölskyldusýning þar sem töfrar, fljúgandi hlutir, óvæntar umbreytingar og leikandi húmor skapa heillandi upplifun fyrir áhorfendur á öllum aldri,“ verður í Lystigarðinum í dag kl. 16:30 og er einnig hluti Listasumars.  Þar verður á ferðinni götulistamaðurinn Eitis Magia, sem verður svo aftur sýnilegur framan við Akureyri Backpackers kl. 20 og hitar upp fyrir dansiballið í göngugötunni.
• Smellið á myndina hér að neðan til að sjá frekari upplýsingar um Magia.

• Á Græna hattinum verður svo boðið upp á djass kl. 21.00 í kvöld. Þar leikur kvartett trommarans Scott McLemore. „Í kjölfar albúmsins Onward undirbýr trommuleikarinn Scott McLemore útgáfu á fjórða albúminu sem hljóðritað var í Tékklandi,“ segir í tilkynningu frá Listasumari. Smellið á myndina til að sjá frekari upplýsingar.