Jón Ingi Cæsarsson

Í dag kveðjum við góðan vin og samstarfsfélaga, Jón Inga Cæsarsson. Jón Ingi var einn af stofnfélögum Arfs Akureyrarbæjar og hafði átt sæti í stjórn samtakanna allt frá stofnun þeirra árið 2022.

Hann hafði djúpan áhuga á skipulagsmálum og lét sig framtíðaruppbyggingu bæjarins varða. Sérstaklega lagði hann áherslu á að þróun bæjarins tæki mið af sögulegu samhengi og heildarásýnd, með virðingu fyrir eldri hverfum og húsum. Oddeyrin, þar sem hann ólst upp og bjó megnið af ævi sinni, átti sérstakan sess í hjarta hans. Hann barðist ötullega fyrir verndun byggðamynstursins þar, m.a. gegn fyrirhugaðri háhýsabyggð á Eyrinni. Það var ekki síst fyrir hans elju og staðfestu að þau áform voru lögð til hliðar.

Við í stjórn og varastjórn Arfs Akureyrarbæjar minnumst Jóns Inga með þakklæti í huga fyrir vel unnin störf í þágu samtakanna og þökkum honum samfylgdina. Fjölskyldu hans sendum við okkar innilegustu samúðarkveðjur.

Stjórn Arfs Akureyrarbæjar