Jólaljósin tendruð á Ráðhústorgi – MYNDIR
Jólaljós voru tendruð á jólatrjám í gær, eins og venjan er á laugardegi fyrir fyrsta sunnudag í aðventu. Þorgeir Baldursson var á ferð með myndavélina og má sjá afraksturinn í myndaalbúmum hér að neðan.
Á Ráðhústorgi var Jólaþorpið opnað og stundu síðar hófst dagskrá á torginu eftir að Lúðrasveit Akureyrar hafði spilað nokkur létt jólalög. Söngkonan Jónína Björt og Hallgrímur Jónas fluttu jólalög, Jóla Lóla leit við á torginu, Barnakór Akureyrar söng og auðvitað mættu rauðklæddu gaurarnir á svæðið, tóku smá forskot áður en þeir hefja heimsóknir í glugga vongóðra barna í bænum.
Erik Vilstrup Lorenzen, sendiherra Danmerkur á Íslandi, og Ásthildur Sturludóttir, bæjarstjóri á Akureyri, ávörpuðu gesti og hin þriggja ára gamla Amanda Schmidt Jensdóttir tendraði ljósin á jólatrénu.
Áður en ljósin voru tendruð á jólatrénu á Ráðhústorgi var dagskrá á Glerártorgi þar sem ljós voru tendruð á stóru jólatré þar. Jóla Lóla og Barnakór Akureyrar gerðu sér ferð á Glerártorgið áður en haldið var í miðbæinn. Rauðklæddir gaurar kíktu líka í heimsókn og leikarar frá norðlenska atvinnuleikhópnum Umskiptingum kynntu glænýja sýningu. Þá voru fulltrúar Rauða krossins á svæðinu að selja Velferðarstjörnuna til styrktar Velferðarsjóði Eyjafjarðar.
Fjölmenni var á ferð og skein gleðin úr hverju andliti, eins og vera ber þegar jólin nálgast og niðurtalningin hefst formlega í hugum margra.
Þorgeir Baldursson var á ferðinni í gær og myndaði stemninguna á báðum stöðum.
