Mannlíf

Guðþjónusta sjómanna og hópsigling – MYNDIR

Skapti Hallgrímsson - skapti@akureyri.net 02.06.2025 kl. 10:00

Húni II og hátt í 30 smábátar sigldu úr Sandgerðisbót og inn á Poll. Mynd: Þorgeir Baldursson

Sjómannadagurinn var í gær og af því tilefni var sjómannadagsguðþjónusta í Glerárkirkja eins og hefð er orðin fyrir. Þar voru tveir fyrrverandi sjómenn heiðraðir – Davíð Hauksson og Óli Helgi Sæmundsson – og að messu lokinni var blómsveigur lagður að minnismerki látinna sjómanna við kirkjuna.

Eftir hádegi var hópsigling Húna II ásamt hátt í 30 smábáta frá Sandgerðisbót inn á Poll og til baka. Almenningi bauðst að sigla með Húna og var áhuginn svo mikill að farnar voru þrjár ferðir.

Sá fallegi siður hefur verið tekinn upp á ný að heiðra fyrrverandi sjómenn. „Hér áður fyrr heiðruðu fagfélög sjómanna alltaf sína menn, einn til tvo á sjómannadaginn hverju sinni; Sjómannafélag Eyjafjarðar gerði þetta, einnig skipstjórafélagið og vélastjórafélagið, og stundum félag matsveina,“ segir Sigfús Ólafur Helgason, sem réðst í það verkefni fyrir þremur árum að endurvekja hátíðahöld sjómanna sem höfðu að mestu lagst af hér í bæ. Þetta datt allt niður fyrir nokkrum árum en nú er Sjómannafélag Eyjafjarðar aftur komið að borðinu og heiðrar sína menn. Ég vil því hvetja hin fagfélög sjómanna til að koma í þetta með okkur og halda áfram að gera sjómannadaginn á Akureyri að þeirri hátíð sem honum ber, m.a. með því að heiðra skipstjóra, stýrimenn, vélstjóra og matsveina í þessum stóra og mikla útgerðarbæ.“

Til baka í yfirlit