Glæsimark Hallgríms og KA í góðum málum!

Hallgrímur Mar Steingrímsson gerði glæsilegt mark undir lok Evrópuleiksins við Silkeborg í Danmörku í dag og tryggði KA jafntefli, 1:1. Þetta var fyrri viðureign liðanna í 2. umferð forkeppni Sambandsdeildarinnar í knattspyrnu.

KA-menn stóðu sig feykivel gegn danska liðinu, ættu að bera höfuðið hátt og mæta fullir bjartsýni til síðari leiks liðanna á Greifavellinum eftir viku. Sigurliðið úr viðureigninni kemst í 3. umferð forkeppni Sambandsdeildar Evrópu.

Silkeborg náði forystu seint í fyrri hálfleik þegar Callum McCowatt skoraði með góðu skoti rétt utan vítateigs. Þegar hefðbundnum leiktíma var að ljúka, og þriggja mínútna uppbótartími að hefjast, jafnaði svo Hallgrímur með frábæru skoti; Birgir Baldvinsson, sem kom inn á nokkrum mínútu áður, átti góða sendingu inn á vítateig utan af vinstri kanti, Rodri skallaði boltann sem barst til Hallgríms og þrumufleygur hans með vinstra fæti hægra megin úr teignum var meira en markvörður heimaliðsins réð við. Boltinn söng efst í horninu fjær. Frábærlega gert!

Meira í kvöld