Fisk Kompaní kaupir Betri vörur á Ólafsfirði

Hjónin Ragnar Hauksson og Ólöf Ásta Salmannsdóttir, eigendur FISK Kompanís á Akureyri, hafa gengið frá kaupum á fyrirtækinu Betri vörur ehf. á Ólafsfirði. „Með kaupunum styrkir FISK Kompaní stöðu sína á markaði fyrir gæða sjávarafurðir og eykur framboð á vörum úr laxi og silungi úr landeldi,“ segir í tilkynningu frá fyrirtækinu.

Betri vörur ehf. hefur starfað á Ólafsfirði frá upphafi og sérhæfir sig í áframvinnslu á ferskum laxi og silungi fyrir innlendan markað eins og verslanir, hótel og veitingastaði.

Vörur fyrirtækisins, meðal annars birkireyktur lax, birkireyktur silungur, birkireykt ýsa og grafinn lax, hafa á undanförnum árum fest sig í sessi sem vönduð munaðarvara á íslenskum matarmarkaði, að því er segir í tilkynningunni.

„Betri vörur bjóða eingöngu upp á reyktan og grafinn lax úr landeldi og hafa því markvisst valið að vinna með lax utan sjókvíaeldis, sem er umdeild aðferð við matvælaframleiðslu vegna neikvæðra áhrifa á umhverfi, lífríki og velferð eldislaxa,“ segir þar.

„Okkur finnst mikilvægt að standa vörð um gæði og ábyrgð í framleiðslu matvæla. Með kaupunum á Betri vörum getum við sameinað krafta, tryggt enn fjölbreyttara vöruúrval og haldið áfram á þeirri braut að bjóða viðskiptavinum okkar lax og silung úr landeldi,“ segir Ragnar Hauksson.

Vörur Betri vara fást nú þegar í verslunum Samkaupa, Fjarðarkaupum, Fiskikónginum, Kaupfélagi Skagfirðinga og Hlíðarkaupum á Sauðárkróki. Stefnt er að því að efla enn dreifingu og sýnileika vörulínunnar í kjölfar kaupanna.

„Næstu mánuði verður lögð áhersla á að samþætta starfsemi fyrirtækjanna, nýta sameiginlega sérþekkingu og tryggja hnökralaust flæði í framleiðslu og dreifingu,“ segir í tilkynningu FISK Kompanís.