Fréttir
Blóðbankinn flytur í nýtt húsnæði
15.11.2026 kl. 15:00
Ingólfur Helgason var fyrsti blóðgjafinn á nýjum stað Blóðbankans á Glerártorgi. Hjúkrunarfræðingurinn Hanna er með honum á myndinni Mynd: Blóðbankinn Glerártorgi
Blóðbankinn á Akureyri er kominn í nýtt og betra húsnæði og býður alla velkomna í heimsókn á morgun, mánudag, á opnunarhátíð milli klukkan 12 og 15 til að skoða nýju aðstöðuna. Flutningarnir eru innanhúss á Glerártorgi og hefur Blóðbankinn fært sig úr suðurhluta byggingarinnar þar sem hann var áður á annarri hæð og yfir í norðurhlið verslunarmiðstöðvarinnar. Gengið er inn um dyr sem er á milli verslunarinnar Blush og pílustaðarins Skor og upp á aðra hæð.
Að sögn Hönnu Vigdísar Jóhannesdóttur, hjúkrunarfræðings hjá Blóðbankanum á Glerártorgi, er nýja rýmið rúmbetra en fyrra húsnæði. Þar eru nú tvö viðtalsherbergi auk aðstöðu fyrir fundi og símtöl við blóðgjafa. Hönnun á húsnæðinu var í höndum Arkís og telst hafa tekist mjög vel. Áfram verða fjórir fastir starfsmenn hjá Blóðbankanum eins og verið hefur.
