Blak: Tveir öruggir sigrar um helgina
KA tók á móti HK Ými í tveimur leikjum í efstu deild kvenna í KA-heimilinu um helgina. Báðir leikirnir enduðu með öruggum sigri KA, 3:0, og er KA-liðið ennþá efst í deildinni og hefur ekki tapað hrinu.
Lið HK Ýmis er skipað ungum og efnilegum leikmönnum úr meistaraflokki HK en HK er núverandi Íslandsmeistari. Hjá KA fengu yngri leikmennirnir einnig að spreyta sig í þessum leikjum og nýttu það tækifæri vel.
Hrinurnar í fyrri leiknum á laugardag fóru 25:11, 25:10 og 25:21. Gestirnir bitu aðeins meira frá sér í sunnudagsleiknum en þá vann KA hrinurnar 25:19, 25:10 og 25:21.
Eins og áður segir er KA með forystuna í deildinni eftir að hafa unnið fyrstu fjóra leikina 3:0. Íslandsmeistarar HK hafa líka unnið fyrstu fjóra leikina en þó tapað tveimur hrinum. Næsti leikur KA er einmitt gegn HK þann 7. nóvember og þá má búast við hörkuviðureign tveggja bestu liðanna í deildinni.
