Aðalstræti 42 – friðað hús og til mikillar prýði

Nokkur af elstu húsum Akureyrar standa í röð sunnanvert við Aðalstræti, í Fjörunni, sem svo heitir, enda þótt Aðalstræti liggi fremur eftir tjarnarbakka nú, vegna síðari tíma uppfyllinga. Hús þessi eru mörg hver byggð um miðja 19. öld og voru flest svipuð að gerð í upphafi en hafa flestöll tekið ýmsum breytingum sem skapa sérkenni hvers og eins þeirra. Eitt af þessum húsum er Aðalstræti 42 sem er friðað vegna aldurs „og til mikillar prýði í einni elstu og rótgrónustu götumynd bæjarins. Húsið og umhverfi þess er í afbragðs góðri hirðu og gefur kvisturinn mikli á framhliðinni húsinu skemmtilegt og einkennandi yfirbragð,“ segir Arnór Bliki Hallmundsson í nýjasta pistli í röðinni Hús dagsins.

Arnór Bliki vitnar í pistlinum til bókar Kristínar Aðalsteinsdóttur, fyrrverandi prófessors, sem árið 2016 heimsótti 80 hús í Innbænum og tók viðtöl við íbúa þeirra, og út kom á bók ári síðar, Innbærinn. Húsin og fólkið. „Meðal annars heimsótti hún Aðalstræti 42 þar sem eigendurnir, Rúna Alexandersdóttir og Þorvaldur Ingvarsson höfðu eftirfarandi að segja: Húsið keyptum við 2014, hér er okkar annað afdrep. Við erum flutt suður en bjuggum á Akureyri í 18 ár og höfum sterkar taugar til bæjarins. Það er góður andi í húsi, börnin okkar hljóta að finna það því þau sækja í að koma hingað. Nýja viðbyggingin er sérstaklega vönduð. Veröndin sunnan við húsið [við viðbygginguna] er mikið notuð og síðan er enn stærri pallur ofar í brekkunni.“