Menning
„Týndu synirnir – sem enginn var að leita að!“
17.08.2026 kl. 20:00
Margt er minnisstætt frá tónlistarhátíðinni góðu, Eyrarrokki, á Verkstæðinu við Strandgötu í fyrrahaust. Meðal annars kom brottflutti bassaleikarinn Atli Hergeirsson upp í hugann þegar litið var yfir viðburði þessarar viku í höfuðstað Norðurlands; Atli fór hamförum á hljóðfærið með þeirri goðsagnakenndu sveit, Toymachine, á síðasta Eyrarrokki og hann mætir vopnaður bassanum á Græna hattinn á fimmtudagskvöldið með félögum sínum í nýlegri hljómsveit, HARMA. Þetta er í fyrsta skipti sem hljómsveitin kemur fram þar fram.
HARMA er samsuða úr nokkrum böndum, eins og Atli orðar það. „Edda Tegeder söngkona og trommarinn Jakob Reynisson eru úr Angist auk þess sem Jakob var í bandinu Blood Feud. Ég kem auðvitað úr Toymachine og gítarleikarinn Sölvi Antonsson, sem einnig er norðanmaður, var í akureysku sveitinni Smarty Pants sem starfaði þar í bæ seint á síðustu öld.“
Atli Hergeirsson var í miklum ham þegar hann djöflaðist á bassanum með Toymachine á Eyrarrokki í fyrrahaust. Að þessu sinni fer hann fingrum um kassahljóðfæri en ekki rafmagns. Mynd: Skapti Hallgrímsson
Atli hefur aldrei lagt frá sér bassann nema stutta stund í einu þótt Toymachine hafi formlega lagt upp laupana fyrir margt löngu. En með HARMA leikur hann reyndar ekki á rafmagnshljóðfæri frekar en aðrir. „Við Sölvi höfum þekkst í fjölda ára, um 30 ár. Hann bjallaði á mig í janúar 2025 og spurði mig hvort ég ætti ekki kassabassa og væri til í að spila. Þá voru hann og Edda, sem eru par, farin að leika sér heima og vildu gera eitthvað spennandi og öðruvísi. Við hittumst þrjú og suðum saman örfá lög,“ segir Atli þegar spurt er hvernig nýja hljómsveitin varð til.
Z upptekinn við að búa til bíó
Þegar þau þrjú voru komin af stað vantaði trommara. „Okkur datt reyndar Baldvin Z í hug en hann gaf það frá sér sökum anna við að búa til bíó,“ segir Atli léttur en kvikmyndaleikstjórinn Baldvin lamdi húðir með Atla og félögum í Toymachine í den tid. „Nærtækast var þá að tala við Jakob sem svo sannarlega small vel inn í hópinn enda frábær trommari og góður gaur. Hann er tölvert yngri en við hin og við köllum hann ýmist unga manninn eða „Our little drummerboy“ – sem passar þó ekki alveg þar sem hann slagar vel í tvo metrana! En þá er gott að hafa hann með okkur lifaða fólkinu, sem höfum gert ýmsa misgáfulega hluti, því hann er sálfræðingur og starfar sem slíkur!“
Edda Tegeder er þekkt fyrir söng með hljómsveitinni Skálmöld í laginu HEL, til dæmis á tónleikum sveitarinnar með Sinfóníuhljómsveit Íslands í Hörpu um árið. „Frammistaða hennar var stórkostleg og þar vakti hún fyrst athygli mína,“ segir Atli og vill ólmur að blaðamaður hlýði á upptöku. Og þá er auðvitað hentugt að lofa lesendum að sjá og heyra líka. Edda hefur upp raust sína þegar rúmar þrjár mínútur eru liðnar af mynbandinu – sjá hér: https://www.youtube.com/watch?app=desktop&v=O-n_BxhvkVg
„Hún syngur nú ekki á þennan hátt með HARMA en gefur dass af þessu hér og þar, sem hentar í nokkrum lögum.“
Gaman að heyra lag verða til
Atli segist njóta sín mun meira á bassanum með HARMA en hann gerði með Toymachine. „Ætli við séum ekki bara að eldast og þroskast tónlistarlega en flest okkar eru að slá í fimmtugt,“ segir hann við akureyri.net. „Ég legg mig fram við að gera eins mögulega flottar bassalínur og ég get við hvert okkar lag. Einna stoltastur er ég af laginu Never touch the ground sem mér finnst afar vel heppnað og Edda syngur það óaðfinnanlega líka. Frammistaða á heimsmælikvarða að mínu mati.“
Bassaleikarinn segir Sölva koma með nánast alla grunna að lögum bandsins á æfingu „og við smíðum svo öll saman ofan á þá þar til það verður til lag. Það er aðferð sem virkar vel fyrir okkur og gaman að heyra hvernig lítill lagbútur getur orðið að lagi þegar við öll gefum allt okkar í þetta með einhverjum fílíng sem við finnum, í raun komandi öll hvert úr sinni áttinni, bæði í tónlist og lífinu sjálfu, en bakgrunnur okkar allra þar er mjög breytilegur.“
Atli segir Sölva frábæran gítarleikara og lagahöfund. „Sölvi er með bakgrunn úr klassískum gítarleik síðan hann var ungur drengur sem svo blandast við aðdáun hans á hljómsveitinni Sonic Youth. Maður heyrir nefnilega oft þessa Sonic Youth bjögun ef hlustað er eftir því í mörgum okkar laga.“ Edda semur textana og eru þeir oft á tíðum afar dökkir og drungalegir, að sögn Atla, „en hún á sér slíka fortíð að hluta og syngur því oftar en mann grunar um eitthvað úr eigin reynslubanka. Frábær söngkona og framúrskarandi einstaklingur sem hefur svo sannarlega unnið sig á góðan stað í sínu lífi og má vera fyrirmynd fyrir aðra vegna þess.“
Nokkur lög komin út
Hljómsveitin gaf út tvö lög í fyrra, smáskífuna Lightless day. „Á þeim tíma vorum við búin að starfa mjög stutt saman og má vel deila um það hversu gáfulegt það var að taka upp eða hvað þá gefa út á þeim tímapunkti!“ segir Atli léttur. Haldið var í Hljóðverk til Einars Vilbergs, sem tók upp plötu Toymachine á sínum tíma, hljóðrituð fjögur lög og tvö þau seinni koma út innan skamms.
Í vor var aftur haldið í hljóðver. Hallur Ingólfssonar tók þá upp þrjú lög sveitarinnar og þau komu öll út í síðasta mánuði á stuttskífunni Open Wounds & Scars.
Enn sem komið er gefur HARMA aðeins út á streymisveitum, hvað sem síðar verður.
Frumleg skilgreining
Atli nefnir að hljómsveitin noti aðeins kassahljóðfæri, eins og áður var nefnt, „en við látum þau samt aldeilis vinna fyrir laununum sínum,“ segir hann. Ekki er algengt að boðið sé upp á kraftmikið rokk með öðru en rafmagnshljóðfærum. „Jakob er auðvitað með fullt trommusett og lúskrar á því með þessu við kraftmikinn söng Eddu,“ segir Atli. Og þegar hann skilgreinir tónlistarstefnu sveitarinnar er ekki annað hægt en taka undir þá fullyrðingu að hún sé frumleg: „Næntís rokkskotin kassagítars folk metal grunge.“ Allt ætti þetta að vera í einu og sama orðinu en með andlega heilsu lesenda í huga ákvað ofanritaður að skipta því í nokkra hluta...
Á persónulegum nótum
Atli leynir því ekki hve hann hlakkar til að skreppa í gömlu heimahagana og spila á Græna hattinum. „Við erum öll full tilhlökkunar,“ segir hann. „Það er einstakt að spila á Græna hattinum. Ég hef alltaf spilað þar fyrir fullu húsi með Toymachine en það verður spennandi að sjá mætinguna á okkar tónleika. Við allavega lofum góðri kvöldstund og góðum tónleikum með örlitlu dassi af stuttri sögustund á milli laga,“ segir Atli og bætir við: „Við viljum hafa þetta á pínu persónulegum nótum og að fólk viti söguna á bakvið hvert lag. Viljum ekki bara mæta á svið og þrykkja í gegnum prógrammið og segja svo bara, „alltílæbæ“! Bandið er klárt og hefur auðvitað aldrei verið betra. Við leggjum líf og sál í það sem við erum að fremja og við vonumst eftir góðri mætingu í heimabæ okkar Sölva; þessara týndu sona bæjarins – sem enginn var að leita að!“
- Tónleikarnir á Græna hattinum eru á fimmtudagskvöldið sem fyrr segir.